ԵՐԵՎԱՆ, 23 հուլիսի․/Նովոստի-Արմենիա/․ Օլիմպիական խաղերը պաշտոնապես կմեկնարկեն հուլիսի 23-ին, բայց որոշ մարզաձևերի մրցումներ արդեն իսկ սկսվել են, սակայն Ուգանդան ներկայացնող ծանրորդ Ջուլիուս Սեկիտոլեկոյի համար այս խաղերն արդեն ավարտված են. նրան արտաքսել են հայրենիք՝ օլիմպիական բազայից փախչելու համար, հաղորդում է armsport-ը:
Ջուլիուսը հանդես է գալիս մինչև 67 կգ քաշային կարգում, նա Աֆրիկայի վերջին առաջնության մեդալակիր է: Սեկիտոլեկոն 20 տարեկան է, նա ՕԽ-ում ընդգրկված է եղել Ուգանդայի պահեստայինների թիմում:
Հունիսի 19-ին Սեկիտոլեկոն իր երկրի հավաքականի կազմում ժամանել է Ճապոնիա, բայց հետո նրան հեռացրել են թիմի՝ց համաշխարհային վարկանիշի նվազման պատճառով: Նա և իր մարզիչը պետք է հուլիսի 20-ին վերադառնային Ուգանդա, սակայն Սեկիտոլեկոն չի ցանկացել վերադառնալ հայրենիք:
Բժշկական շտաբի անդամները, ովքեր ցանկացել են Ուգանդայի հավաքականի անդամների հետ կորոնավիրուսի թեստավորում իրականացնել, Ջուլիուսի սենյակում գրություն են հայտնաբերել: Մարզիկը գրել է, որ ինքը չի ցանկանում վերադառնալ Ուգանդա՝ երկրում տիրող վատ կենսամակարդակի պատճառով, և մտադիր է նոր աշխատանք գտնել Ճապոնիայում: Իսկ իր իրերը խնդրել է փոխանցել իր կնոջը, որը մնացել է Ուգանդայում:
Այդ օրը մարզիկը պատասխանել է Ուգանդայի ներկայացուցիչներից մեկի հեռախոսազանգին, բայց ասել է, որ չի կարող խոսել ու անջատել է զանգը:
Արդեն հուլիսի 16-ին ծանրորդի նկատմամբ խետախուզում է հայտարարվել:
Ոստիկանությունն անմիջապես սկսել է ծանրորդի որոնման աշխատանքները: Հուլիսի 20-ին նրան գտել են Միե պրեֆեկտուրայում, որտեղ ապրում է մոտ 150 փախստական Ուգանդայից: Դրանից մեկ օր առաջ մարզիկին նկատել են տեղի կայարանի տեսախցիկներով:
Ավելի ուշ հայտնի է դարձել, որ Ջուլիուսը գնացքի տոմս է գնել դեպի Նագոյու. մոտ 200 կմ հեռավորությամբ այն քաղաքից, որտեղ մարզվում է նրա հավաքականը:
«Ես դեպի Նագոյու գնացքի տոմս եմ գնել իմ սեփական միջոցներով, հանգրվանել էի կայարանի մոտակա հյուրանոցներից մեկում: Արդեն քաղաքում ես կապ էի հաստատել ինձ ծանոթ ուգանդացիներից մեկի հետ, ով ինձ օգնում էր: Երբ իմացա, որ ինձ փնտրում է ոստիկանությունը, թաքնվեցի մեկ այլ տեղում: Ես պարզապես չէի ցանկանում տուն վերադառնալ»,- խոստովանել է մարզիկը բերման ենթարկվելիս:
Ջուլիուսը չի ընդդիմացել, այլ միայն լաց է եղել:
Հիմա նրան կարտաքսեն հայրենիք:-0-