«Նրա իրավունքն ա, որոշել ա, գնում ա». ԿԳՄՍ նախարարը` Լևոն Արոնյանի երկրից գնալու մասին (ՎԻԴԵՈ)
00:31
27 Փետրվարի 2021
ԵՐԵՎԱՆ, 27 փետրվարի./Նովոստի–Արմենիա/. ՀՀ ԿԳՄՍ նախարար Վահրամ Դումանյանն ափսոսանք է հայտնել հայկական շախմատի արքա, գրոսմայստեր Լևոն Արոնյանի որոշման կապակցությամբ, որ այսօր հայտնել է, որ հեռանում է Հայաստանից։
«Շախմատի ոլորտում կայացվող կործանարար որոշումները կասեցնելու իմ բոլոր փորձերը տապալվեցին: Ինձ այդպես էլ չհաջողվեց բացատրել նոր կառավարությանը, որ շախմատը մեր երկրում մեծ ժառանգություն է, և որ այս ոլորտում մեր հաջողությունները, թերևս, մեր երկրի ամենամեծ ձեռքբերումներից են: Անձամբ ինձ համար հայկական շախմատի հաղթանակները Անկախ Հայաստանի երկրորդ հպարտությունն են՝ 1992-1994թթ. Արցախյան ազատամարտում մեր հաղթանակից հետո», – նշել է Արոնյանը։
Ուրբաթ ճեպազրույցի ընթացքում Դումանյանը մեկնաբանել է Արոնյանի որոշումը։
«Դա նրա իրավունքն է, որոշել է, գնում է։ Շատ ցավում եմ, որ Արոնյանը նման որոշում է կայացրել, շատ բարձր եմ գնահատում նրա շախմատային նվաճումները։ Զարմացած եմ, որ նման որոշում է կայացրել, ուրախ կլինեմ, որ վերանայի իր որոշումը։ Կարող եմ մեկ բան ֆիքսել մեր ունեցած տվյալների հիման վրա. չկա մի պաշտոնական պարտավորություն Արոնյանի նկատմամբ, որ նախարարությունը չի կատարել», – ասել է նախարարը։–0–