Հրապարակվել է Մեսսիի նամակի լուսանկարը, որը նա ուղարկել էր «Բարսելոնայի» ղեկավարությանը (ՖՈՏՈ)

ԵՐԵՎԱՆ, 26 օգոստոսի./Նովոստի–Արմենիա/. Համացանցում հայտնվել է «Բարսելոնայի» հարձակվող Լիոնել Մեսսիի նամակի լուսանկարը, որը ֆուտբոլիստը ֆաքսով ուղարկել էր կատալոնական ակումբի ղեկավարությանը՝ խնդրելով թույլատրել իրեն հեռանալ թիմից որպես ազատ գործակալ, հաղորդում է armsport.am–ը:

«Այս նամակի համաձայն, ես՝ Լիոնել Անդրես Մեսսին, խնդրում եմ դադարեցնել աշխատանքային պայմանագիրը հարգարժան ակումբի հետ` պաշտպանելով ինձ 24-րդ կետով, ինչը թույլ է տալիս ինձ կիրառել այդ իրավունքը: Ես բարձր եմ գնահատում անհատական ​​աճի և պրոֆեսիոնալ վերապատրաստման բոլոր հնարավորությունները, որոնք տրամադրվել են ինձ համատեղ աշխատանքի ընթացքում: Բայց անձնական դրդապատճառները ստիպեցին ինձ կայացնել այս դժվարին որոշումը, և հուսով եմ, որ ղեկավարությունը կկարողանա այն լավագույնս ընդունել», – ասվում է Մեսսիի նամակում:

Հիշեցնենք, որ նախօրեին հայտնի դարձավ, որ Մեսսին որոշել է հեռանալ «Բարսելոնայից»։

Մեսսին նման որոշում է կայացրել «Բարսելոնայի» նորանշանակ գլխավոր մարզիչ Ռոնալդ Կումանի հետ զրույցից հետո:

Մեսսիի ծառայություններով հետաքրքրված են մանչեսթերյան 2 ակումբները, «Ինտերը», «Ինտեր Մայամին: Մի խոսքով, ո՞վ չի ցանկանա իր կազմում ունենալ Մեսսի:

Մեսսին «Բարսայի» ակադեմիայում է 2000 թ-ից: Առաջին թիմում անցկացրած 731 խաղում դարձել է 634 գոլի ու 285 արդյունավետ փոխանցման հեղինակ: Նվաճել է 6 «Ոսկե գնդակ»:–0–