ԵՐԵՎԱՆ, 17 մայիսի. /Նովոստի-Արմենիա/. Երեքշաբթի Երևանում տեղի է ունեցել Խուլերի շախմատի աշխարհի անհատական առաջնության բացումը, որին ներկա են գտնվել ՀՀ նախագահ Սերժ Սարգսյանը և ՖԻԴԵ-ի նախագահ Կիրսան Իլյումժինովը:
Սարգսյանը, ով նաև Հայաստանի շախմատի ֆեդերացիայի նախագահն է, կատարել է խորհրդանշական առաջին քայլը մրցաշարի բացման ժամանակ:
«ՖԻԴԵ-ի համար այսօր մեծ պատիվ է բացել և անցկացնել Խուլերի հերթական 16-րդ առաջնությունը: Նման կարգի մրցաշար առաջին անգամ է անցկացվում Հայաստանում», - հայտարարեց Իլյումժինովը Շախմատի տանը տեղի ունեցած հանդիսավոր միջոցառման ժամանակ:
Նրա խոսքով, Երևանի ընտրությունը պայմանավորված է նրանով, որ այս քաղաքը համաշխարհային շախմատի մայրաքաղաքն է, իսկ Հայաստանի ազգային հավաքականը բազմիցս նվաճել է օլիմպիական չեմպիոնի տիտղոսը:
Ինչպես նշեց Հայաստանի խուլերի միության նախագահ Գրիգոր Գրիգորյանը, հայ շախմատիստները երկրորդ անգամ են մասնակցում խուլերի աշխարհի առաջնությանը:
«Առաջին անգամ մասնակցել ենք այս առաջնությանը 2012 թ.-ին Ղազախստանում և լավ արդյունքների ենք հասել: 2016 թ.-ին Հայաստանից մրցաշարին մասնակցում են 45 շախմատիստներ», - ասաց նա` ավելացնելով, որ շախմատն այն եզակի մարզաձևերից է, որը հնարավորություն ունեն խաղալ բոլորը:
Գրիգորյանն ընդգծեց, որ Հայաստանում շախմատի զարգացումը մեծ ուշադրության է արժանանում պետական մակարդակով:
Առաջնությանը, որը մեկնարկեց մայիսի 16-ին և կշարունակվի մինչև մայիսի 26-ը, մասնակցում են 120 շախմատիստներ աշխարհի 24 երկրներից` բաժանված 7 ենթախմբերի:
Բացման արարողությունից հետո Սարգսյանը և Իլյումժինովը ծաղիկներ են դրել շախմատի աշխարհի 9-րդ չեմպիոն Տիգրան Պետրոսյանի կիսանդրու մոտ, որը գտնվում է Շախմատի տան բակում:
Նույն օրը Շենգավիթ համայնքում Սարգսյանը մասնակցել է շախմատի մանկապատանեկան մարզադպրոցի բացման արարողությանը, որը գլխավորել է հանրաճանաչ գրոսմայստեր Ռաֆայել Վահանյանը:
«Մարզադպրոցի շենքը կառուցվել է 2015 թ.-ին թիվ 110 հանրակրթական դպրոցի հարևանությամբ: Այս տարվա մարտից մենք արդեն սկսել ենք աշակերտների ընդունելությունը: Նրանց թիվն այս կարճ ժամանակահատվածում կազմել է 240», - տեղեկացրեց լրագրողներին Վահանյանը: Նրա կանխատեսումներով, սեպտեմբերին մարզադպրոցի սաների թիվը կհասնի 400-ի:
Վահանյանն ընդգծեց, որ Երևանն աշխարհում միայն քաղաքն է, որի յուրաքանչյուր համայնքում գործում է շախմատի առանձին դպրոց:
Տնօրենի խոսքով, ուսուցումը դպրոցում անվճար է, դասավանդողների թվում են գրոսմայստերներ և շախմատի միջազգային վարպետներ: «Մենք երեխաներին ընդունում ենք հինգ տարեկանից և, դասավանդողների կարծիքով, նրանք կարող են իսկական չեմպիոններ դառնալ», - նշեց Վահանյանը:
Հայաստանի տղամարդկանց շախմատի հավաքականը Համաշխարհային շախմատի օլիմպիադաների եռակի չեմպիոն է (2006 թ.-ին` Թուրինում, 2008 թ.-ին` Դրեզդենում և 2012 թ.-ին` Ստամբուլում): -0-
