Ժոզե Մաուրինյոն` «Մանչեսթեր Յունայթեդի» գլխավոր մարզիչ

ԵՐԵՎԱՆ, 27 մայիսի. /Նովոստի-Արմենիա/. «Մանչեսթեր Յունայթեդ» անգլիական ակումբը պաշտոնապես հաստատել է Ժոզե Մաուրինյոյի նշանակումը թիմի գլխավոր մարզչի պաշտոնում: Այդ մասին հաղորդում է ակումբի մամուլի ծառայությունը:

Կողմերի համաձայնագիրը նախատեսված է երեք տարով: Պորտուգալացի մասնագետը «Մանչեսթեր Յունայթեդի» գլխավոր մարզչի պաշտոնում փոխարինել է այս շաբաթ աշխատանքից հեռացված հոլանդացի Լուի վան Գալին, հաղորդում է ՏԱՍՍ-ը:

Մաուրինյոն երկու անգամ եղել է անգլիական «Չելսիի» գլխավոր մարզիչը: 2004-2007 թթ.-ին «Չելսիի» հետ նա երկու անգամ նվաճել է Անգլիայի չեմպիոնի տիտղոսը (2004/05, 2005/06), ինչպես նաև` է Անգլիայի գավաթը (2007), երկու անգամ Լիգայի գավաթը (2005, 2007) և Անգլիայի Սուպերգավաթը (2005): Լոնդոնյան ակումբից հեռանալուց հետո նա գլխավորել է իտալական «Ինտերը» (2008-2010) և «Ռեալը» (2010-2013):

2013/14 խաղաշրջանից առաջ Մաուրինյոն վերադարձել է «Չելսի»: Նրա ղեկավարությամբ թիմը հաղթել է 2014/15 խաղաշրջանի Անգլիայի առաջնությունը, ինչպես նաև նվաճել է Լիգայի գավաթը (2015): Անցած տարվա դեկտեմբերին նա հեռացվել է աշխատանքից` ոչ բավարար արդյունքների համար:

Ավարտված խաղաշրջանի արդյունքով, «Մանչեսթեր Յունայթեդը» զբաղեցրել է Անգլիայի առաջնության 5-րդ հորիզոնականը և նվաճել Անգլիայի գավաթը: -0-