«Զվարթնոց» օդանավակայանում բրազիլացի է մահացել. ինչ է հայտնի
ԵՐԵՎԱՆ, 13 օգոստոսի․/Նովոստի-Արմենիա/․ Օրեր առաջ «Զվարթնոց» օդանավակայանում ողբերգական դեպք է տեղի ունեցել։ Բրազիլիայից Հայաստան ժամանած մի ուղևորի ձեռքին ՊԵԿ մաքսային ծառայության աշխատակիցները շիշ են նկատել, հետաքրքրվել են՝ ինչ է մեջը, բրազիլացին պատասխանել է՝ գինի, գրում է «Հրապարակ» օրաթերթը։
Օրաթերթի տեղեկություններով՝մաքսայինի աշխատակիցները շշի պարունակությունը ստուգելու փոխարեն ստիպել են բրազիլացուն խմել այն, որը խմելուց հետո նրա ինքնազգացողությունը կտրուկ վատացել է, և նա րոպեներ անց մահացել է։ Պարզվել է, որ շշի մեջ թմրանյութ է եղել։
«Նովոստի-Արմենիա» գործակալությանը Ներքին գործերի նախարարությունից հայտնեցին, որ անհրաժեշտ փաստաթղթերը փոխանցվել է Քննչական կոմիտե։
«Ահազանգ ունենք, որ սիրտ-անոթային անբավարարվածությամբ օտարերկրացի են տեղափոխել հիվանդանոց, որը մահացել է։ Մենք փաստաթղթերն ու ահազանգը փոխանցել ենք Քննչական կոմիտե»,- նշեց ՀՀ ՆԳ նախարարի մամուլի քարտուղար Նարեկ Սարգսյանը։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
