Սուրճը ոչ միայն օգտակար է, այլև անհրաժեշտ․ նյարդաբաններ

ԵՐԵՎԱՆ, 10 հուլիսի. /Նովոստի-Արմենիա/․ Նյարդաբանները շարունակում են ուսումնասիրել, թե ինչպես են սուրճն ու կոֆեին պարունակող մթերքներն ազդում ուղեղի աշխատանքի վրա: Այս անգամ ԱՄՆ-ի և Ճապոնիայի մի քանի հեղինակավոր համալսարանների գիտնականներ եկել են այն եզրակացության, որ սուրճ խմելը ոչ միայն օգտակար է, այլև ինչ-որ չափով, նույնիսկ, անհրաժեշտ, գրում է Inc.Russia ամսագիրը :

Պարզվել է, որ դրանք դրականորեն են ազդում նյարդային ցանցերի գործունեության վրա: Սա իր հերթին կարող է մարդուն փրկել ինսուլտից, ինչպես նաև Ալցգեյմերի և Պարկինսոնի հիվանդություններից:

Ինչպես ասվում է World Journal of Surgical Oncology-ի զեկույցում, 11 խոշոր ուսումնասիրությունների տվյալների վերլուծության արդյունքում պարզվել է, որ կոֆեինը ոչ միայն նվազեցնում է Ալցգեյմերի հիվանդության ռիսկը, այլև կարող է նաև փրկել ուղեղի քաղցկեղից։

 Օկայամա համալսարանի (Ճապոնիա) գիտնականները եկել են նաև այն եզրակացության, որ սուրճի մի շարք բաղադրիչներ ուժեղացնում են ուղեղի սոսնձող բջիջների հակաօքսիդային հատկությունները. դա օգնում է բարելավել ուղեղի աշխատանքը: -0-