Մարդու իրավունքների պաշտպանության վերաբերյալ կարճամետրաժ սոցիալական ֆիլմերի փառատոնի գլխավոր հաղթող են ճանաչվել ռեժիսորներ՝ Արեն Մալաքյանը և Անի Պողոսյանը, հայտնեց Հայաստանում ՄԱԿ-ի հանրային տեղեկատվության վարչության ներկայացուցիչ Մարիա Դոցենկոն:
«Մենք շատ ենք հպարտանում, որ հայ երիտասարդության կողմից շատ լավ ֆիլմեր են ներկայացվել: Հայ երիտասարդությունն իսկապես գիտի մարդու իրավունքները և շատ բան է անում, որ ինչ-որ ստեղծագործական մեթոդով այդ տեղեկությունը տարածի իր ընկերների և գործընկերների շրջանում»,- ուրբաթ լրագրողներին ասաց Դոցենկոն:
Դոցենկոն նշեց, որ փառատոնին ավելի քան 50 հայտ է ներկայացվել, որոնցից ընտրվել է 20-ը:
Դոցենկոն պատմեց, որ համանման փառատոն է անցկացվել նաև մի շարք այլ երկրներում, մասնավորապես՝ Ավստրիայում, Վրաստանում և Ուկրաինայում:
Ըստ նրա, ՄԱԿ-ի երևանյան գրասենյակի այցելուները, ինչպես նաև Նյու Յորքում ՄԱԿ-ի գրասենյակը, կարող են դիտել փառատոնի լավագույն ֆիլմերը: Կինոնկարները կտեղադրվեն Youtube կայքի և կազմակերպության վեբ էջերում:
Սոցիալական ցանցերի փառատոնը մեկնարկել է օգոստոսի 12-ին՝ Երիտասարդության օրը, իսկ հայտերի ընդունման վերջին օրը եղել է 2011թ.-ի նոյեմբերի 28-ը:
Փառատոնը կազմակերպվել էր ՄԱԿ-ի Հանրային տեղեկատվության վարչության, Մարդու իրավունքների գերագույն հանձնակատարի, ՄԱԿ-ի Բնակչության հիմնադրամի, ՄԱԿ-ի Զարգացման ծրագրի, ԵԱՀԿ և Եվրոպայի խորհրդի երևանյան գրասենյակների կողմից` Հայաստանի արտաքին գործերի նախարարության և Մարդու իրավունքների պաշտպանի գրասենյակի աջակցությամբ: -0-
