Սկանդալ «Կոմերսանտ»–ում. մի ամբողջ բաժին աշխատանքից ազատվելու դիմում է ներկայացրել

ԵՐԵՎԱՆ, 20 մայիսի./Նովոստի–Արմենիա/. «Կոմերսանտ» հրատարակչատան հատուկ թղթակից Իվան Սաֆրոնովը և քաղաքականության բաժնի խմբագրի տեղակալ Մաքսիմ Իվանովը հեռանում են պարբերականից Դաշնային խորհրդի խոսնակ Վալենտինա Մատվիենկոյի հրաժարականի մասին նյութի պատճառով։ Երկու լրագրողների կարծիքով, այդպիսի որոշում է կայացրել բաժնետերը։ Նրանք լքում են հրատարակչատունը կողմերի համաձայնությամբ, հայտնում է «Վեդոմոստի»–ն։

«Լրագրողներին հրաժեշտ ենք տվել, քանի որ գրառումը պատրաստելիս խախտվել են «Կոմերսանտ»–ի խմբագրման չափանիշները»,– թղթակիցների հեռացումը մեկնաբանել է «Կոմերսանտ»–ի գլխավոր տնօրեն Վլադիմիր Ժելոնկինը։

Ազատման դիմում են ներկայացրել քաղաքականության բաժնի բոլոր աշխատողները և նրանց վերահսկող ղեկավարները, Facebook–ի իր էջում գրել է «Կոմերսանտ»–ի գլխավոր խմբագրի տեղակալ Գլեբ Չերկասովը։ Դիմում է գրել նաև ինքը, թղթակիցներ Նատալյա Կորչենկովան, Ալեքսանդրա Ջորջևիչը, Սոֆյա Սամոխինան, Ելիզավետա Միլերը, Կատերինա Գրոբմանը, Վսեվոլոդ Ինյուտինը, ինչպես նաև տեսաբան Վիկտոր Խամրաևը և հատուկ թղթակից Աննա Պուշկարսկայան։

Մատվիենկոյի հնարավոր հրաժարականի մասին նյութը հրապարակվել է ապրիլի 17–ին։ Նրանում ասվում էր, որ մայիսին Դաշնային խորհրդի խոսնակը նախագահ Վլադիմիր Պուտինի հետ կքննարկի իր հնարավոր հրաժարականը։ Նրա պաշտոնի հնարավոր թեկնածու էր նշվում Արտաքին հետախուզության ծառայության պետ Սերգեյ Նարիշկինը։

Սա «Կոմերսանտ»–ում երկու ամսում երկրորդ մեծ սկանդալն է։ Մարտին իր ազատման մասին հայտնել էր թղթակից Մարիա Կարպենկոն։ -0-