Ռոբերտ Քոչարյանն արդեն տանն է

ԵՐԵՎԱՆ, 20 հունիսի․ /Նովոստի-Արմենիա/․ ՀՀ երկրորդ նախագահ Ռոբերտ Քոչարյանն արդեն տանն է։ Այս մասին հայտնել է նրա փաստաբան Վահե Եփրիկյանը։
Նախօրեին Վերաքննիչ քրեական դատարանն ավարտեց ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի պաշտպանների՝ Քոչարյանի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննությունը։ Վերաքննիչ դատարանը բավարարեց Հայաստանի երկրորդ նախագահ Ռոբերտ Քոչարյանի փաստաբանների բողոքը: Նա կալանքից ազատ կարձակվի 2 միլիարդ դրամի գրավը վճարելու դեպքում։

Ինչպես նշեց Խուդոյանը, Քոչարյանի գրասենյակից տեղեկատվություն է ստացվել այն մասին, որ բազմաթիվ մարդիկ պատրաստակամություն են հայտնել աջակցել գրավի գումարը հավաքելու համար, սակայն նրանց ինքնությունը դեռ չի հրապարակվում։

«Դե ինչ, սիրելի ընկերնե՛ր, Նախագահ Քոչարյանը տանն է, պայքարս՝ արդարացված, սպասումներս ու նպատակներս՝ կատարված, #Ազատություն_Նախագահին հեշթեգն՝ իրականություն»,- գրել է նա Facebook-յան իր էջում։

Փաստաբանը շնորհակալություն է հայտնել հարյուրավոր ծանոթ - անծանոթներին, ովքեր երեկվանից շնորհավորում են․ «Անչափ ուրախալի է, երբ շնորհավորում են քոչարյանական պայքարի հաղթանակի առթիվ, վերստին շնորհավորում եմ բոլորիս, Նախագահին՝ բարի վերադարձ, մեզ՝ իր օրինակով՝ առավել վճռականություն, կամք ու տոկունություն, սա առաջին քայլն էր դեպի վառ գալիք, հզոր ու արժանապատիվ պետություն»,-գրել է նա։

Ավելի ուշ, Ռոբերտ  Քոչարյանի գրասենյակը հաղորդագրություն է տարածել, որում ասվում է.

«Վերաքննիչ քրեական դատարանի որոշմամբ նախատեսված գրավի վճարումից և օրենքով սահմանված բոլոր գործընթացներն ավարտելուց հետո հունիսի 19-ի երեկոյան Նախագահ Քոչարյանի խափանման միջոց կալանավորումը վերացվել է։ Ռոբերտ Քոչարյանը վերադարձել է տուն, սակայն շարունակելու է վերականգնողական բուժումը «Իզմիրլյան» բժշկական կենտրոնում՝ բժիշկների սահմանած ժամանակացույցին համապատասխան։

Եվս մեկ անգամ շնորհակալություն ենք հայտնում 2 մլրդ դրամ գրավի վճարման գործում Քոչարյանների ընտանիքին աջակցած հանրահայտ խոշոր գործարարներին և բարերարներին, ինչպես նաև այն բազմաթիվ քաղաքացիներին, որոնք նախօրեին կամավորության սկզբունքով գումարներ են փոխանցել պետական համապատասխան հաշվեհամարին»։-0-