Քաղաքագետ. հայերի հետ միջադեպերը կզրոյացնեն Ադրբեջանի ծախսերը միջազգային վարկանիշի ձևավորման գործում

ԵՐԵՎԱՆ, 29 մայիսի./Նովոստի–Արմենիա/. Հայերի հետ միջադեպերը, ինչպես, օրինակ, Հենրիխ Մխիթարյանի հետ սկանդալը, անիմաստ են դարձնում Ադրբեջանի ծախսերը միջազգային վարկանիշի ձևավորման հարցում, կարծում է ադրբեջանագետ, քաղաքական գիտությունների թեկնածու Անժելա Էլիբեգովան։

Լոնդոնի «Արսենալի» կիսապաշտպան Հենրիխ Մխիթարյանը չի մասնակցի այսօր Բաքվում կայանալիք Եվրոպա լիգայի` «Չելսիի» հետ եզրափակիչ խաղին։ Մարզիկը բաց կթողնի այդ խաղն անվտանգությունից ելնելով` հաշվի առնելով Հայաստանի և Ադրբեջանի քաղաքական լարված հարաբերությունները։


«Ադրբեջանը փաստացի միշտ մեծ գումարներ է ծախսում հանդուրժող, բազմազգ և ժողովրդավար պետության միջազգային վարկանիշի ձևավորման վրա։ Այնտեղ պարբերաբար միջազգային միջոցառումներ են անցկացվում, բայց երբ հայերի հետ միջադեպեր են տեղի ունենում, այդ ծախսերը զրոյանում են»,– չորեքշաբթի կայացած մամուլի ասուլիսում ասաց նա։

Քաղաքագետը նշեց, որ արդեն առաջին անգամ չէ, որ Մխիթարյանն ուղևորություն է ծրագրում Ադրբեջան, բայց չեղարկում է այն, քանի որ գտնվում է Ադրբեջանի ԱԳՆ «սև ցուցակում»։

«Այս անգամ Ադրբեջանը ճկունություն դրսևորեց` նա կա ցուցակում, մուտքն արգելված է, բայց, լավ, թող գա։ Այսինքն, «սև ցուցակը» գործում է, երբ պետք է»,– փաստեց Էլիբեգովան։

Միաժամանակ նա հիշեցրեց Եվրոպայից ԵԼ եզրափակչի վիզա չստացած հայազգի երկրպագուների հետ միջադապերը։


«Դա արվել է ոչ այն պատճառով, որ այդ մարդիկ իշխանությունների «գլխացավանքն են» և կարող են վտանգ ներկայացնել։ Ես հակված եմ այլ կերպ կարծել, որ ադրբեջանական իշխանությունները, ի զորու չլինելով ապահովել այս քաղաքացիների անվտանգությունը, որոշել են ընդհանրապես փակել այդ թեման` տհաճ միջադեպերից խուսափելու համար»,– ասաց Էլիբեգովան։

Օրեր առաջ Հայաստանի ֆուտբոլի ֆեդերացիայի փոխտնօրեն Արմեն Մելիքբեկյանը CNN–ին տված հարցազրույցում կասկածանք է հայտնել այն հարցով, թե Ադրբեջանը կարող էր ամբողջովին երաշխավորել «Արսենալի» կիսապաշտպան Հենրիխ Մխիթարյանի անվտանգությունը։ -0-