Պետական քարոզչությունը Հայաստանում մեդիադաշտի փոխարեն. մեդիափորձագետը՝ ֆեյքերի դեմ պայքարի մասին

ԵՐԵՎԱՆ, 24 նոյեմբերի./Նովոստի-Արմենիա/. Հայաստանում հիմա մեդիադաշտ գոյություն չունի, տարածությունը լցված է պետական քարոզչությամբ, որը փոխարինել է ադրբեջանական ֆեյքերի գործողություններին: Այս մասին մամուլի ասուլիսի ընթացքում հայտնել է մեդիափորձագետ Տիգրան Քոչարյանը՝ պատասխանելով «Նովոստի-Արմենիա» գործակալության հարցին:

«Հայաստանում մենք մեդիադաշտ չունենք հիմա, մենք լրատվամիջոցներ չունենք, ցավոք սրտի, մենք ունենք քարոզչամիջոցներ: Եվ իրականությունը խեղաթյուրված է ֆեյքերով, մեկնաբանություններով: Կան դասական ԶԼՄ-ներ, դասական օգտատերեր, և կա պետության և օլիգարխների կողմից ֆինանսավորվող մի ամբողջ բանակ, որը խեղաթյուրում է իրականությունը»,- նշել է մեդիափորձագետը:

Քոչարյանի խոսքով, մարդը, երբ որ մտնում է հայկական մեդիադաշտ, ինքը չի ստանում գոյություն ունեցող պատկերը. օգտատիրոջը շեղում են, իրեն ուրախացնում են, շողոքորթում են, վախեցնում են, մանիպուլացնում են, տանում անհասկանալի ուղղություններով, որպեսզի նա չհասկանա, թե ինչում է վտանգը:

«Անգամ հիմա, եթե մարդը հայտնվում է մեդիադաշտում, եթե հատկապես ընկնում է պետական ֆեյքային քարոզչության տակ, նա կարող է մտածել, որ մենք հաղթել ենք պատերազմը, և Նիկոլ Փաշինյանն այն առաջնորդն է, ով մեզ կտանի ապագա հաղթանակների»,- նշել է Քոչարյանը: 

Մեդիափորձագետը հայտնել է, որ ահռելի իմպերիա կա և միլիոնավոր դոլլարներ են ներդրվել կեղծ քարոզչություն տարածելու համար: Նա հայտնել է, որ ադրբեջանական ֆեյքերն այսօր այլևս չեն գործում հայկական մեդիադաշտում, իսկ դրանց աշխատանքն իրականացնում են պետական հայկական ֆեյքերը:

Քոչարյանը հայտնել է, որ առանցքային գաղափարները, որոնք առաջ է մղում իշխանական քարոզչամեքենան, հետևյալն է. հները ծախել են արդեն, Աստված չտա Նիկոլը գնա, «հները» կվերադառնան; եթե Փաշինյանը չլիներ, ապա թշնամին արդեն Սևանի մոտ էր լինելու; թուրքերը լքել են Շուշին, իսկ Փաշինյանը խորամանկ ծրագիր ուներ այդ առումով:

Իշխանական քարոզչամեքենայի դեմ պայքարելու համար, մեդիափորձագետը կոչ է արել հեռացնել բոլոր օգտատերերին, ովքեր լայքում են Փաշինյանի գրառումները և ֆեյքերին:

«ԶԼՄ-ներին ես խորհուրդ եմ տալիս արգելակափակել կամ մոդեռացնել մեկնաբանությունները, իսկ YouTube-ների տեսանյութերի տակ ընդհանրապես չթողնել մեկնաբանելու հնարավորությունը, որովհետև ֆեյքը ապրում է մեկնաբանություններով»,- նշել է Քոչարյանը:

Փորձագետի խոսքով, եթե արգելափակենք ֆեյքային էջերը, ապա նրանց աշխատանքն անիմաստ է դառնում. նրանք ստիպված են ստեղծել նոր էջեր, խնդիրներ են ծագում գործատուների հետ և այլն:

« Ամենուր, որտեղ ֆեյքը հնարավոր է երևա, արգելափակել հասանելիությունը: Որքան ֆեյքը քիչ տարածություն ունենա աշխատանքի համար, այնքան արդյունավետ կլինի պայքարը (ֆեյքերի դեմ): Շատ մարդիկ, ովքեր Facebook-ում կամ Telegram ալիքում էջեր էին վարում, հեռացվել են աշխատանքից կամ կասեցվել է ֆինանսավորումը, քանի որ նրանց աշխատանքը անարդյունավետ էր. իրենք չէին կարողանում ուղեղ լվանալ, քանի որ տեղ չունեին անելու»,- նշել է նա: -0-