Պակիստանցին գլխով 43 կոկոս է կոտրել (ՏԵՍԱՆՅՈՒԹ)

ԵՐԵՎԱՆ, 9 հունվարի. /Նովոստի-Արմենիա/. Պակիստանցի մարզիկ Ռաշիդ Նասիմը ռեկորդ է սահմանել` 60 վայրկյանում գլխով ջարդելով 43 կանաչ կոկոս:

Ինչպես հաղորդում է lenta.ru-ն, հղում անելով Hindustan Times պարբերականին, նման արդյունքի հասնելու համար Կարաչիի 30-ամյա բնակիչը մարզվել է 6 ամիս: Չնայած, որ նա զբաղվում է մարտարվեստով, նախապատրաստման ժամանակ նա չի կարողացել խուսափել վնասվածքներից:

Սա Ռաշիդ Նասիմի առաջին ռեկորդը չէ: Ինչպես հաղորդում է Daily Mail-ը, մոտ մեկ տարի առաջ նա 60 վայրկյանում գլխով ջարդել է 210 ընկույզ:

«Ես հինգ անգամ փորձել եմ հայտնվել Գինեսի ռեկորդների գրքում, - հայտարարել է Նասիմը, - Իմ նպատակն է` 50 ռեկորդ սահմանել, որպեսզի երկիրս հպարտանա ինձանով»:

Դեկտեմբերին հայտնի էր դարձել, որ բրիտանուհի մարզիկ Լիզա Դենիսը կանանց շրջանում համաշխարհային ռեկորդ է սահմանել` մեկ րոպեում մերկ ձեռքերով 923 աղյուս ջարդելով: -0-