Միլիարդատեր Սարկիսով եղբայրները կփոխհատուցեն Մոսկվայում անկարգությունների հետևանքով ադրբեջանական բիզնեսին հասցված վնասը
ԵՐԵՎԱՆ, 26 հուլիսի./Նովոստի-Արմենիա/. ՌԵՍՈ ապահովագրական խմբի համասեփականատեր, միլիարդատեր Սերգեյ Սարկիսովը դիմել է ադրբեջանական և հայկական սփյուռքի ներկայացուցիչներին՝ կոչ անելով նպաստել Մոսկվայում անկարգությունների դադարեցմանը՝ հայ-ադրբեջանական սահմանին իրավիճակի սրացման ֆոնին: Նրա կոչը հրապարակվել է Սարկիսովների ընտանիքի և «Հայերի ասամբլեայի» անունից, հաղորդում է ՌԲԿ-ն:
Սարկիսովը, մասնավորապես, հայտարարության մեջ նշել է, որ ամաչում է նրանցից, ովքեր «Հայրենիքից հեռու նախաձեռնել են իրենց ազգայնամոլության բարբարոսական դրսևորումը՝ ծեծելով կամ սպանելով մարդկանց, պարզապես այն պատճառով, որ նրանք այլ ազգի են պատկանում»:
Նրա խոսքով, «անհրաժեշտ է կանգնեցնել նրանց, ովքեր Ռուսաստանի սահմաններից դուրս իրենց ազգակիցներին ծայրահեղականության են հրահրում»: Սարկիսովը հայտնել է, որ իր ընտանիքը պատրաստ է փոխհատուցել Մոսկվայում վանդալների կողմից ադրբեջանցիների սեփականության հասցված վնասը: Բիզնեսմենը վստահություն է հայտնել, որ իր հետ կհամաձայնեն նաև ադրբեջանցի ձեռնարկատերերը, ովքեր նույնպես կփոխհատուցեն անկարգությունների հետևանքով հայերի սեփականությանը հասցված վնասը:
«Դիմում եմ հայկական և ադրբեջանական մտավորականության ներկայացուցիչներին, երկու ազգությունների բիզնեսի ներկայացուցիչներին. դադարեցրեք, խելքի բերեք վանդալներին և ծայրահեղականներին: Բացատրեք նրանց, որ մեր ժողովուրդների ավանդույթներին հարիր չէ նման պարզաբանումներ անելը տան մեջ, որտեղ ձեզ ընդունել են, աշխատելու և ապրելու, ձեր երեխաների սովորելու հնարավորություն են տվել: Ես նկատի ունեմ Ռուսաստանը: Մի՛ խայտառակեք ձեր ժողովուրդներին, ձեր նախնիներին: Այն, ինչ կատարվում է այս վերջին օրերին, տան տերերի նկատմամբ անշնորհակալության և ոչ հարգալից վերաբերմունքի դրսևորման անթույլատրելի ձև է:
Մեր ընտանիքն իր վրա է վերցնում վնասների փոխհատուցումը, որոնք ադրբեջանցի բիզնեսմենների սեփականությանը հասցվել է հայերի կողմից, ովքեր,իրենց հիմարության կամ մոլորության հետևանքով համարում են, որ իրական տղամարդը նա է, ով ավելի բարձր է գոռում կամ ապակի ջանդում»,- նշել է նա իր ուղերձում:
Սերգեյ Սարկիսովը «ՌԵՍՈ–Գարանտիա» ապահովագրական ընկերության հիմնադիրն է: Նա ներառված է ընկերության տնօրենների խորհրդում և հանդիսանում է Ապահովագրողների ռուսական միության նախագահության և վարչության անդամ: Նա Forbes-ի ռուսաստանցի միլիարդատերերի վարկանիշում զբաղեցնում է 147-րդ տեղը՝ 700 մլն դոլար կապիտալով:
Հարձակումներ և սադրանքներ
Վերջին օրերին հայ օգտատերերը սոցցանցերում կոչ են անում ՌԴ-ում գտնվող հայրենակիցներին լինել զգոն, քանի որ ադրբեջանցիները խմբեր են ձևավորել և հարձակվում են հայերի վրա, անգամ ծերերի:
ՌԴ-ում ՀՀ արտակարգ և լիազոր դեսպան Վարդան Տողանյանը «Говорит Москва» ռադիոկայանի հետ զրույցում կատարվող իրադարձությունները սադրանք է անվանել և նշել, որ բախումները ծրագրված են ադրբեջանցիների կողմից:
Ավելի վաղ հաղորդագրություններ է ստացվել հայկական և ադրբեջանական համայնքների միջև բախումների մասին Մեծ Բրիտանիայում, ԱՄՆ-ում, Բելգիայում: -0-
