Կինն այցելել է գինեկոլոգի և հայտնաբերել է, որ ինքը տղամարդ է

ԵՐԵՎԱՆ, 29 նոյեմբերի. /Նովոստի–Արմենիա/. Չինաստանում կինը դիմել է բժիշկի և հայտնաբերել է, որ կենսաբանորեն տղամարդ է։ Այդ մասին գրում է Lenta.ru–ն` հղում անելով Asia One լրատվական պորտալին։

Դեպքը տեղի է ունեցել Խունան նահանգում։ Չինուհին, ով ցանկացել է, որ իր անունը չհրապարակվի, արդեն մեկ տարի է` ինչ ամուսնացած է, բայց հղիանալ չի կարողանում։ Նա գնացել է գինեկոլոգի մոտ, ով զննումից հետո ասել է, որ կնոջը չի կարելի կենսաբանորեն կին համարել։


Նա պետք է տղամարդ լիներ, բայց կին է ծնվել և սովորել է երջանիկ լինել։

Ամենայն հավանականությամբ, կինը տառապում է անդրոգենների նկատմամբ անզգայունության համախտանիշով, որի դեպքում մարդն ունի կնոջ արտաքին, զարգացած կրծքով և հեշտոցով, բայց նրա մոտ բացակայում են արգանդն ու ձվարանները, միաժամանակ առկա են ամորձիներ, որոնք չեն իջել։ Օրգանիզմում Y քրոմոսոմի առկայության պատճառով այսպիսի մարդը կենսաբանորեն տղամարդ է։

Այսպիսի մարդիկ կարող են իրենց նույնականացնել որպես կին, տղամարդ կամ ինտերսեքս (միջսեռային անձ)։ ՄԱԿ–ի մարդու իրավունքների գերագույն հանձնակատարի վարչության գնահատականով, միջսեռականությունը նշանակում է ոչ տիպիկ սեռական հատկանիշների կամ քրոմոսոմների առկայություն։

ՄԱԿ–ի մոտավոր հաշվարկներով, անատոմիկ այսպիսի առանձնահատկություններով ծնվում է երեխաների մինչև 1.7 տոկոսը։ -0-