ԵՐԵՎԱՆ, 24 դեկտեմբերի. /Նովոստի-Արմենիա/. Հունաստանի խորհրդարանը հավանություն է տվել միասեռ ամուսնությունների օրինականացման օրենքին: Քվեարկությունն անցկացվել է դեկտեմբերի 22-ին, որի ընթացքում միապալատ խորհրդարանի 300 ներկայացուցիչներից 194-ը կողմ են քվեարկել օրինագծի ընդունմանը, 55-ը` դեմ, գրում է
Lenta.ru-ն` հղում անելով Gay Star News-ին:
Երկրի Սահմանադրության փոփոխությունները թույլ կտան կարգավորել միասեռ զույգերի գույքին և ժառանգությանը վերաբերող հարցերը: Լրացումները չեն անդրադառնա ոչ ավանդական կողմնորոշում ունեցող ամուսինների կողմից երեխաների որդեգրմանը:
ILGA համասեռամոլների և լեսբուհիների միջազգային ասոցիացիայի խորհրդի համանախագահ Ջոյս Հեմիլթոնն (Joyce Hamilton) ընդունել է, որ քաղաքական գործիչները կատարել են տված խոստումը, իսկ ասոցիացիայի գործադիր տնօրեն Էվելին Պարադիզն (Evelyne Paradis) օրենսդիր մարմնի որոշումն անվանել է հասարակայնության բազմամյա աշխատանքի արդյունք:
Ինչպես հայտնում է Greek Reporter-ը, Ալեքսիս Ցիպրասը քվեարկությունից առաջ դիմել է խորհրդարանին և ներողություն խնդրել, որ օրինագծի դիտարկումն ուշացել է: Ցիպրասն ուրվագծել է Հունաստանի կառավարության և քաղաքացիների նոր ուղին` ասելով. «Այժմ ԼՀԲՏ հանրությունն ու դրա հետևորդները կտեսնեն իրենց երկրի պայծառ ապագան»:
Քվեարկության արդյունքներով, Հունաստանը դարձել է առաջին ուղղափառ երկիրը, որն օրինականացրեց միասեռ ամուսնությունները, և 26-րդը` եվրոպական պետությունների շարքում:
Առաջին միասեռ ամուսնությունները Հունաստանում գրանցվել են 2008 թվականին: Նորապսակները թերություն են հայտնաբերել 1982 թվականի օրենքում, որը չի ճշգրտում ամուսնացող մարդկանց սեռական պատկանելիությունը:
Դեկտեմբերի 21-ին Սլովենիայի քաղաքացիները մերժել են օրենքը, որը միասեռ զույգերին իրավունք կտար ամուսնանալ և երեխաներ որդեգրել: Մարտին երկրի խորհրդարանն ընդունեց այդ նույն օրենքը, բայց այն ուժի մեջ չմտավ, քանի որ «Երեխաների համար» հասարակական շարժումը բողոքարկեց որոշումը Գերագույն դատարանում` հասնելով նրան, որ հարցը բարձրացվի հանրաքվեում: -0-
