Հրապարակվել է Քիմ Քարդաշյանի կարողությունը

ԵՐԵՎԱՆ, 28 դեկտեմբերի. /Նովոստի–Արմենիա/. Hypebae պարբերականը հաշվարկել է ամերիկահայ հայտնի դեմք Քիմ Քարդաշյանի կարողությունը 2018 թվականի դրությամբ, հայտնում է Lenta.ru–ն։

Քարդաշյանի KKW Beauty կոսմետիկ ապրանքանիշը նրան 100 միլիոն դոլար է բերել, իսկ Kim Kardashian: Hollywood բջջային հավելվածը` 45 միլիոն դոլար։ Բացի այդ, ռեալիթի շոուում նկարահանումների շնորհիվ 38–ամյա Քարդաշյանը վաստակել է 20 միլիոն դոլար։

Նրա Instagram–ի յուրաքանչյուր գովազդային հրապարակման արժեքը հասել է 1 միլիոն դոլարի։

Տարվա ընթացքում Քարդաշյանը նաև անշարժ գույքի մի քանի գործարք է իրականացրել, մասնավորապես, վաճառել է Լոս Անջելեսի իր տունն 9 միլիոն դոլարով։


Եկամտի լրացուցիչ աղբյուր է դարձել նրա մասնակցությունը համաշխարհային ընկերությունների խոշոր պրոմո–տեսահոլովակների և այլ նախագծերի։

Այսպիսով, 2018 թվականի վերջին Քիմ Քարդաշյանը կուտակել է մոտ 350 միլիոն դոլար։
Հուլիսին Forbes պարբերականը հայտարարել էր, որ Քիմ Քարդաշյանի կրտսեր քույրը` Քայլի Ջեները, կդառնա աշխարհում ինքնուրույն կարողություն կուտակած ամենաերիտասարդ միլիարդատերը։ Աղջիկը 2016 թվականին հիմնել է կոսմետիկ միջոցների սեփական ապրանքանիշը և վաստակել է 900 միլիոն դոլար։ -0-