ԵՐԵՎԱՆ, 20 հուլիսի. /Նովոստի-Արմենիա/. Գերմանիայի կանցլեր Անգելա Մերկելի ախտորոշումը հայտնի է: Բադ Բրամշթեդտի Շոնայի հոգեսոմատիկ կլինիկայի և հոգեթերապիայի գլխավոր բժիշկ Բերնհարդ Օսենը կարծում է, որ Մերկելի մոտ «օրթոստատիկ տրեմոր» կա, հայտնում է
medikforum.ru-ն` հղում անելով Daily Express պարբերականին:
Օրթոստատիկ տրեմորը հիվանդագին վիճակ է, որը բնութագրվում է մարմնում և ոտքերում բարձր հաճախականության ցնցումներով, որն առաջանում է ոտքի կանգնելիս, բայց վերանում է քայլելրի, նստելիս կամ պառկելիս:
Ինչպես գրում է պարբերականը, առաջին անգամ Մերկելը ցնցումներ է ունեցել հունիսի 18-ին` Ուկրաինայի նախագահ Վլադիմիր Զելենսկուն Բեռլինում դիմավորելիս: Նա դրանից հետո մեկնաբանել է, թե ցնցումները կապված էին ջրազրկման հետ:
Ինն օր անց նա կրկին ցնցվել է, երբ ԳԴՀ նախագահ Ֆրանկ-Վալտեր Շթայնմայերը Բելվյու դղյակում հանդիպել է արդարադատության նոր նախարար Կրիստինա Լամբրեխթի հետ:
Ցնցման երրորդ նոպան մի քանի օր անց էր, բայց Մերկելը կրկին ասել է, թե ամեն ինչ նորմալ է:
Բերնհարդ Օսենի կարծիքով, նախորդ նոպաների մասին հիշողություններն առաջացնում են նորերը: Նա նշում է, որ հաճախակի ցնցումներից խուսափելու համար պետք է մարմնի մկանները թուլացնող հատուկ վարժություններ կատարել:
Նոյշթադտի կլինիկայի նյարդաբանության և կլինիկական նյարդաֆիզիոլոգիայի բաժնի գլխավոր բժիշկ Ուվե Յանյեն ասել է, որ «օրթոստատիկ տրեմորն» անվնաս հիվանդություն է, որն ի հայտ է գալիս մարդու մոտ միայն կանգնած ժամանակ:
«Օրթոստատիկ տրեմորը կարելի է բուժել, մասնավորապես, այսպես կոչված, բենզոդիազեպինների օգնությամբ, սակայն դրանք ունեն որոշ կողմնակի ազդեցություններ, օրինակ, գլխապտույտ կամ հոգնածություն, այդ իսկ պատճառով պետք է օրգանիզմի համար օպտիմալ դեղամիջոց գտնել», - նշել է նա: -0-
