ԵՐԵՎԱՆ, 11 հունիսի. /Նովոստի–Արմենիա/. Պուշկինի անվան թանգարանը և Հայաստանի պատմության թանգարանը բանակցություններ են վարում ուրարտական քաղաքակրթությանը նվիրված ցուցահանդեսի նախապատրաստման մասին։ Ցուցահանդեսը խոստանում է համաշխարհային սենսացիա դառնալ։ Այդ մասին ՏԱՍՍին տված հարցազրույցում ասել է Ռուսաստանի նախագահի` միջազգային մշակութային գործակցության հատուկ ներկայացուցիչ Միխայիլ Շվիդկոյը։
«Մոսկվայի թանգարանում չափազանց հետաքրքիր արտեֆակտեր կան։ Մեծ հավաքածու է պահվում ձեր թանգարանում»,– պատմել է Շվիդկոյը։ Նրա կարծիքով, ցուցադրությունը միանգամայն հետաքրքիր կլինի ռուս և հայ լսարանին, բայց, անկասկած, մեծ հետաքրքրություն կառաջացնի նաև այլ երկրներում։ «Դա վառ պատմություն կլինի։ Այսպիսի նախագծերը չափազանց կարևոր են, և դրանք պետք է շատ լինեն»,– շարունակել է նա։
Շվիդկոյը նշել է, որ հայկական ներկայացվածությունը ռուսական մշակույթում էական է` որպես օրինակ բերելով Արամ Խաչատրյանին և Առնո Բաբաջանյանին, հայ դասական Հրանտ Մաթևոսյանին, ում գրեթե բոլոր ստեղծագործությունները թարգմանվել են ռուսերեն, և Մոսֆիլմի տնօրեն Կարեն Շահնազարովին։
«Էլ ի՞նչ է պետք գերազանց մշակութային կապերի համար։ Բայց եթե լուրջ, ապա մենք խնդիրներ ունենք։ Մենք չգիտենք հայկական ժամանակակից գրականությունը, ռուսականն էլ Հայաստանում առանձնապես ներկայացված չէ։ Կինոյի ոլորտում գործակցությունը շատ ցածր մակարդակում է»,– ասել է նա։
Շվիդկոյի խոսքով, կարևոր է չկենտրոնանալ միայն դասական ձևերի վրա, այլ ներկայացնել երկու երկրների ժամանակակից արվեստը, իսկ դրա համար անհրաժեշտ են երիտասարդների փոխանակման ամենատարբեր ձևեր, և Հայաստանի նախագահի հետ այդ հարցը լրջորեն քննարկվել է։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
