GQ–ն ռուսաստանաբնակ երեք հայերի թեկնածությունը ներկայացրել է «Տարվա մարդ» մրցանակին

ԵՐԵՎԱՆ, 2 հունիսի. /Նովոստի–Արմենիա/. GQ ռուսական ամսագիրը ռուսաստանաբնակ երեք հայերի թեկնածությունը ներկայացրել է «Տարվա մարդ» մրցանակին։

«GQ տարվա մարդ» մրցանակաբաշխությունն ավանդաբար անցկացվում է սեպտեմբերին։ Քվեարկությունը, որի միջոցով կորոշվի այս տարվա մարդը, անցկացվում է մինչև հուլիսի 31–ը։

«Տարվա ռեստորատոր» անվանակարգում ներկայացված է Ալեքսանդր Օգանեզովը, ով Ռուսաստանի «Չայխոնա №1» լավագույն ցանցային նախագծերի համահեղինակն է։


Ռուսաստանաբնակ ևս մեկ հայ` «Մագնիտ» մանրածախ ցանցի գլխավոր տնօրեն և «Կրասնոդար» բացառիկ մարզադաշտի ստեղծող Սերգեյ Գալիցկիի թեկնածությունը ներկայացվել է «Տարվա գործարար» կատեգորիայում։ Նրա մասին ամսագրի հեղինակները գրել են, որ նա Կրասնոդարում մարզադաշտ է բացել, որը տեղացիները կոչում են «Գալիզեյ»` նրա պատվին։

Ամսագրի անվանակարգերում առկա է նաև բռնցքամարտիկ Միխայիլ Ալոյանը, ում թեկնածությունը ներկայացվել է «Տարվա մարզիկ» անվանակարգում։

Ամսագիրն ընդհանուր առմամբ ներկայացրել է 11 կատեգորիա, որոնցից յուրաքանչյուրում հնգական թեկնածու է։ Բացի այդ, կան հատուկ մրցանակներ գործընկերներից։ Hugo Boss–ը մրցանակ կհանձնի «Տարվա տնօրենին», IQOS–ը կորոշի, թե ով է «Տարվա ոգեշնչումը», իսկ հատուկ մրցանակ կհանձնի S.T. Dupont ընկերությունը։ Ըստ ավանդույթի` Johnnie Walker–ը կորոշի նրանց, ովքեր հետևում են «Առաջընթացին»։–0–