3 հայ գյուտարարներ, որոնց գաղափարները փոխել են աշխարհը դեպի լավը (ՖՈՏՈ)

ԵՐԵՎԱՆ, 29 մայիսի. /Նովոստի-Արմենիա/․ Աշխարհը, որում մենք ապրում ենք, մեզ թվում է, եթե ոչ լավագույններից մեկը, ապա միակ հնարավորը: Այն, ինչը մեզ այսօր հասանելի է և համարվում է ինքնին բնական՝ մի քանի դար առաջ, հրաշք կհամարվեր: Եվ այս հրաշքները հեղինակներ ունեն:

«Նովոստի-Արմենիա» գործակալությունը կազմել է պատմական այն երեք կարևորագույն հայ անձանց վարկանիշը, որոնց գյուտերն ու գաղափարները իրենց ազդեցությունն են ունեցել աշխարհի ապրելակերպի վրա:

Ալեք Մանուկյան, գործարար, գյուտարար, բարերար

Ալեք Մանուկյանը ծնվել է 1901 թ․-ին Զմյուռնիայում (այժմ՝ Իզմիր, իսկ այդ ժամանակ՝ Օսմանյան կայսրության մաս): Փախչելով 1915 թվականի Հայոց ցեղասպանությունից՝ նա գաղթել է Միացյալ Նահանգներ: 

Ժամանելով Միացյալ Նահանգներ որպես փախստական​​՝ նա քրտնաջան աշխատանքով հասել է հսկայական հաջողությունների: Մանուկյանը ստեղծել է «Delta»-ն` առաջին հաջող առևտրային ծորակը՝ մեկ բռնակով: Նրան հաջողվել է իրականացնել դասական ամերիկյան երազանքը: Այսօր ամբողջ աշխարհը օգտագործում է նրա հանճարեղության չափ պարզ գյուտը: Գործարարը նվիրաբերելով միլիոնավոր դոլարներ, իր ունեցվածքը ուղղել է կրթական և բարեգործական ծրագրերի, որոնցից շատերը ծառայում են տասնյակ երկրների հայ համայնքին: 

Բորիս Բաբայան, գերհամակարգչի ստեղծողը

Բորիս Բաբայանը այն մարդկանցից մեկն է, ով շատ բան է արել գերհամակարգիչների ստեղծման և զարգացման համար: Նա այս ոլորտում առաջիններից մեկն է եղել և հսկայական դեր է խաղացել խորհրդային ​​գերհամակարգչային համակարգերի ստեղծման և զարգացման գործում: Բաբայանը և իր գործընկերները 1978 թ.-ին մշակել են «Эльбрус-1» սուպերսկալյարային համակարգիչը, որը Խորհրդային Միությունում օգտագործվում էր միջուկային էներգետիկայի և տիեզերական արդյունաբերության մեջ:

Ռայմոնդ Վահան Դամադյան, ամերիկահայ գիտնական և գյուտարար

Դամադյանը մագնիսական ռեզոնանսային տոմոգրաֆիայի սարքի գյուտարարն է: 1988-ին գիտնականը ստացել է տեխնոլոգիայի ազգային մեդալ: Սկաների առաջին օրինակն այժմ ցուցադրվում է Գյուտարարների փառքի ազգային թանգարանում (Աքրոն, Օհայո, ԱՄՆ): Նրա աշխատանքը ճանաչում են ստացել ԱՄՆ-ի մի շարք համալսարաններում: -0-