ԵՐԵՎԱՆ, 26 հունվարի./Նովոստի-Արմենիա/. ՉԺՀ-ում նոր կորոնավիրուսի տարածման տեմպերն արագացել են: Այս մասին հաղորդում է Ինտերֆաքսը՝ հղում անելով ՉԺՀ-ի նախագահ Սի Ցզինպինին:
«Մենք բախվել ենք բարդ իրավիճակի, քանի որ նոր կորոնավիրուսի տարածումն արագանում է»,- նախագահի խոսքերն են մեջբերել չինական պաշտոնական ԶԼՄ-ները:
Ընդ որում, Սի Ցզինպինը կոչ է արել Չինաստանի Կոմունիստական կուսակցության կենտկոմին ակտիվորեն մասնակցել այս խնդրի լուծմանը:
Ավելի վաղ հայտնի էր դարձել, որ երկրի տարածքում գրանցվել է նոր կորոնավիրուսով վարակման 1355 հաստատված դեպք: Չինական ժամանակով շաբաթ երեկոյան մահացած հիվանդների թիվը չի փոխվել՝ 41 մարդ:
Ինչպես հայտնում է Global Times-ը, նոր կորոնավիրուսից բնակչության պաշտպանության համար Չինաստանի իշխանությունները կիրառում են ուժեղացված միջացառումներ, որոնք ներգրավվել են ավելի քան 1 մլրդ. մարդու: Ըստ տեղեկությունների, արդեն 22 նահանգներում և մունիցիպալիտետներում բնակչության առողջության համար վտանգից ելնելով՝ տագնապի ամենաբարձր մակարդակն է գործում:
Չինական CGTN հեռուստաալիքի հաղորդմամբ, ՉԺՀ-ի իշխանությունները որոշել են կանգնեցնել երկրի նահանգները կապող ավտոբուսների երթևեկությունը վտանգավոր վիրուսի տարածումը կանխելու համար: Ըստ տեղեկությունների, այդ միջոցառումը ուժի մեջ կմտնի հունվարի 26-ից սկսած:
Հիշեցնենք, որ դեկտեմբերի Չինաստանի Ուխան քաղաքում արձանագրվել է թոքաբորբի բռնկում։ Ավելի ուշ պարզվել է, որ հիվանդության պատճառը կորոնավիրուսի տեսակն է, որն ավելի վաղ հայտնի չի եղել։ Վիրուսի տարածման էպիկենտրոնը Ուխանն է, սակայն հիվանդության դեպքեր են գրանցվել նաև Թայլանդում և Ճապոնիայում։ Չինաստանի իշխանությունները մտավախություն ունեն, որ համաճարակը կարող է ավելի շատ տարածվել։
Ըստ ՌԴ սպառողների իրավունքների պաշտպանության և մարդու բարեկեցության ոլորտի վերահսկողության դաշնային ծառայության (Ռոսպոտրեբնադզոր) տվյալների, Ռուսաստանում ՉԺՀ-ի նոր կորոնավիրուսով վարակման դեպք չի գրանցվել: -0-
