ԵՐԵՎԱՆ, 12 նոյեմբերի./Նովոստի–Արմենիա/. ՌԴ ՊՆ 27–րդ կենտրոնական գիտահետազոտական ինստիտուտի գիտնականները մշակել են բացառիկ կենսաբանական ակտիվ հավելում, որը կոչվում է «ԿովԲԱԴ»։ Այն կարողանում է վարակակրի մոտ 16 անգամ նվազեցնել կորոնավիրուսի կոնցենտրացիան։ Այս մասին հայտնել է ճառագայթային, քիմիական և կենսաբանական պաշտպանության զորքերի հրամանատար, գեներալ–լեյտենանտ Իգոր Կիրիլովը, գրում է lenta.ru–ն` հղում անելով «Կրասնայա զվեզդա»–ին։
Կենսաբանական ակտիվ հավելումների արդյունավետությունը գնահատելուց հետո նրանցից մեկը ստացել է պետական գրանցման վկայական։
«Մեր փորձարկումները ցույց են տվել, որ «ԿովԲԱԴ»–ը սննդի մեջ օգտագործելուց հետո արդեն երկրորդ օրը քթաըմպանում վիրուսի քանակը նվազում է երկու անգամ, իսկ 6–րդ օրը վիրուսի կոնցենտրացիան նվազում է 16 անգամ», – նշել է ճառագայթային, քիմիական և կենսաբանական պաշտպանության զորքերի հրամանատար, գեներալ–լեյտենանտ Իգոր Կիրիլովը։
Գեներալ լեյտենանտն ավելացրել է, որ ռազմական գիտնականների մշակած կենսաբանական ակտիվ հավելումների շնորհիվ նվազում է կորոնավիրուսի ազդեցությունը մարդու օրգանիզմի վրա։ Հիվանդությունն ընթանում է պակաս բարդություններով։ Նրա խոսքով, կենսաբանական ակտիվ հավելումների հիմնական բաղադրիչներն են արոսի, էխինացեայի մզվածքը, ֆուկոիդանը, խաղաղօվկիանոսյան կաղամարի հիդրոլիզատն ու այլ բուսական ծագման նյութեր, որոնց շնորհիվ բարձրանում է օրգանիզմի հակավիրուսային պաշտպանությունը։–0–
