ԵՐԵՎԱՆ, 17 փետրվարի./Նովոստի–Արմենիա/. Ամերիկացի գիտնականները գտել են հիշողությունն ու գլխուղեղի աշխատանքը լավացնող պարզ միջոց։
Գիտնականները կարծում են, որ լավացմանը նպաստում է ցանկացած ֆիզիկական ակտիվություն, գրում է medikforum.ru–ն` հղում անելով EurekAlert!–ին։
Որքան շատ է մարդը վարում նստակյաց կենսակերպ, այնքան բարձր է տկարամտության ռիսկը։
Գիտնականները հետազոտել են 454 մարդու, որոնք համաձայնվել են մահից հետո զոհաբերել սեփական ուղեղն` անալիզ անցկացնելու համար։ 20 տարի շարունակ մարդկանց պարբերաբար թեստավորել են` ստուգելով ֆիզիկական ուժի, մտածողության և հիշողության մակարդակը։ Մահից մոտ երկու տարի առաջ հետազոտության մասնակիցները ստացել են հատուկ սարք, որը հագցրել են ձեռքին։ Այն վերահսկել է ֆիզիկական ակտիվության մակարդակը։
Ուսումնասիրելով կամավորների ուղեղն ու համադրելով դրա ցուցանիշները թեստերի արդյունքների և ակտիվության մակարդակի հետ` գիտնականները պարզել են, որ նստակյած կենսակերպը վնասում է ուղեղի կոգնիտիվ ֆունկցիաներին, իսկ ցանկացած ակտիվություն լավացնում է գլխուղեղի աշխատանքն ու հիշողությունը։
Մինչ այդ Դորտմունդի համալսարանի նեյրոֆիզիկոսները ևս ապացուցել էին, որ ֆիզիկական ակտիվությունը լավացնում է գլխուղեղի աշխատանքը։ Մասնավորապես, ինչպես նշել են գիտնականները, շատ օգտակար է պարել, դա փրկում է «մտավոր ոչնչացման» համախտանիշից։ Գիտնականները պարզաբանել են, որ երաժշտության ներքո կատարվող ռիթմիկ շարժումներն ակտիվացնում են գլխուղեղի արյան շրջանառությունը և խթանում հաճույքի հորմոնի` օքսիտոցինի առաջացումը, որը մասնակցում է գլխուղեղի բջիջների` նեյրոնների արտադրության գործընթացում։–0–
