Բժիշկները պարզել են արյան բարձր ճնշման գլխավոր վտանգներից մեկը

ԵՐԵՎԱՆ, 29 սեպտեմբերի./Նովոստի–Արմենիա/. Արյան բարձր ճնշումը մեծահասակների մոտ կոգնիտիվ խախտումների զարգացման ռիսկի հիմնական գործոններից է։ Տեսականորեն այն կարող է հանգեցնել նաև Ալցհեյմերի հիվանդության զարգացման, այս մասին նշում է American Heart Association–ը։

Ամերիկյան կարդիոլոգիական ասոցիացիայի Hypertension ամսագրում հրապարակված հոդվածում ներկայացված է մի քանի ուսումնասիրությունների ամփոփագիր, որոնք նվիրված են հիպերտոնիայի ազդեցությանը գլխուղեղի կաթվածի, կոգնիտիվ խանգարումների, Ալցհեյմերի հիվանդության և այլ հիվանդությունների զարգացման վրա, գրում է vokrugsveta կայքը։

Ըստ այս տվյալների` դեպի գլխուղեղ արյան հոսքի խանգարումը, որն առաջանում է բարձր ճնշման հետևանքով, կարող է դառնալ գլխուղեղի կոգնիտիվ ֆունկցիաների մի շարք փոփոխությունների պատճառ։

Հայտնի է, որ հիպերտոնիայի դեմ դեղորայքի ընդունումը նվազեցնում է սիրտ–անոթային հիվանդությունների ռիսկը (ինֆարկտ, գլխուղեղի կաթված)։ Դեռ հարկավոր են լրացուցիչ ուսումնասիրություններ` պարզելու համար` արդյո՞ք հիպերտոնիայի բուժումը կարող է նվազեցնել կոգնիտիվ խանգարումների ռիսկը մեծահասակների շրջանում։

Ձեռք բերովի թուլամտությունը, որպես կանոն, առաջանում է շատ ավելի ուշ, քան ճնշման հետ կապված խնդիրները։ Այդ պատճառով գիտնականներին ուսումնասիրությունների և վերլուծության համար բավականին երկար ժամանակ է անհրաժեշտ` արդյունավետ դեղորայք ընտրելու նպատակով։

Հիշեցնենք, որ ձեռք բերովի թուլամտությունը առավել շատ տարածված նյարդաբանական խանգարումներից է, որն աշխարհում զարգանում է 30–40 մլն մարդու մոտ։ Սպասվում է, որ 2050 թ.–ին թուլամտությամբ տառապող մարդկանց թիվն աշխարհում կարող է եռապատկվել։

Ամերիկացի գիտնականներն ավելի վաղ բացահայտել են առողջ ծերության գաղտնիքներից մեկը։ Նրանց խոսքերով, մեծահասակների ֆիզիկական և էմոցիոնալ վիճակի կարող է լավացնել ակտիվ կենսակերպն ու կամավորական գործունեությունը։–0–