33–ամյա արմավիրցին իր տանը A4 ֆորմատի թղթից պատրաստել է 2 հատ 5000 դրամ. նրան մեղադրանք է առաջադրվել

02.02.2019, 11:45
33–ամյա արմավիրցին իր տանը A4 ֆորմատի թղթից պատրաստել է 2 հատ 5000 դրամ. նրան մեղադրանք է առաջադրվել։
33–ամյա արմավիրցին իր տանը A4 ֆորմատի թղթից պատրաստել է 2 հատ 5000 դրամ. նրան մեղադրանք է առաջադրվել

ԵՐԵՎԱՆ, 2 փետրվարի. /Նովոստի–Արմենիա/. ՀՀ քննչական կոմիտեի Արմավիրի մարզային քննչական վարչությունում ավարտվել է կեղծ փողեր պատրաստելու, պահելու և իրացնելու դեպքի առթիվ հարուցված քրեական գործի նախաքննությունը. ձեռք բերված ապացույցների համակցությամբ մեղադրանք է առաջադրվել Արմավիրի մարզի 33-ամյա բնակչին, հաղորդում է ՀՀ ՔԿ մամուլի ծառայությունը։

Ձեռնարկված քննչական և դատավարական միջոցառումների արդյունքում պարզվել է կեղծ թղթադրամների պատրաստման հանգամանքները, եղանակը։

Քննությամբ ձեռք բերված տվյալների համաձայն՝ Արմավիրի մարզի բնակիչը՝ ծնված 1985թ., որոշել է իրացման նպատակով պատրաստել 5000 դրամ անվանական արժեքով կեղծ թղթադրամներ:

Այս նպատակով նա 2014թ. հունվար ամսին գունավոր շիթային տպիչով պատճենահանման եղանակով, տպագրության համար նախատեսված A4 ֆորմատի թղթից իր տանը պատրաստել է 2 հատ 5000 դրամ անվանական արժեքով կեղծ թղթադրամ և դրանք պահել իր տանը:

Մինչդատական վարույթում ձեռք բերված տվյալների համաձայն՝ 33-ամյա տղամարդը կեղծված թղթադրամներից մեկը 2018թ. նոյեմբերի 15-ին իրացրել է Արմավիր քաղաքում ՝ պարտքով  տալով նույն մարզի մեկ այլ բնակչի, իսկ երկրորդը պահել է իր մոտ:

Քրեական գործով ձեռք բերված բավարար ապացույցների հիման վրա՝ Արմավիրի մարզի՝ 1985թ. ծնված բնակչին մեղադրանք է առաջադրվել՝ ՀՀ քրեական օրենսգրքի 202-րդ հոդվածի 1-ին մասով (կեղծ փողեր կամ արժեթղթեր պատրաստելը, պահելը կամ իրացնելը): Նրա նկատմամբ որպես խափանման միջոց է կիրառվել ստորագրություն՝ չհեռանալու մասին:

Հայտարարվել է նախաքննության ավարտի մասին, և քրեական գործը՝ մեղադրական եզրակացությամբ, ուղարկվել դատարան:–0–