Ռուսաստանում գործարկվում է Instagram–ի ռուսական տարբերակը` Россграм–ը

ԵՐԵՎԱՆ, 16 մարտի./Նովոստի–Արմենիա/. Մարտի վերջին Ռուսաստանում նախատեսվում է գործարկել Instagram–ի ռուսական նմանակը` Россграм սոցցանցը, հաղորդում է ARKA Telecom հեռահաղորդակցական պորտալը` հղում անելով Rossgram.ru–ի համահիմնադիր, ինտերնետային մարկետոլոգ Ալեքսանդր Զոբովին։

«Մենք` իմ գործընկեր Կիրիլ Ֆիլիմոնովի և մեր մշակողների խմբի հետ արդեն պատրաստ էինք իրադարձությունների նման հանգուցալուծմանը և որոշել ենք բաց չթողնել հնարավորությունն ու ստեղծել հայտնի և մեր հայրենակիցների կողմից սիրված սոցցանցի ռուսական տարբերակը», – նշել է Զոբովը։

Նրա խոսքով, նոր սոցցանցում կլինեն մոնետիզացիայի բոլորրին հայտնի, ինչպես նաև լրացուցիչ գործիքներ` վճարովի հասանելիություն կոնտենտին, քրաուդֆանդինգի գործառույթ և այլն։

«Մենք աշխատում ենք նաև Instagram–ից տվյալների փոխանցման ֆունկցիայի վրա, այդ պատճառով փորձեք ներբեռնել ձեր տվյալները Instagram–ից` մտնելով Կարգավորումներ – Գաղտնիություն և անվտանգություն – Տվյալների ներբեռնում – JSON ձևաչափով ֆայլի ներբեռնում (ոչ HTML)», – նշել է նա։

Բոլոր ցանկացողները կարող են հայտ լրացնել կայքում` սոցցանցի գործարկման մասին ծանուցում ստանալու համար։

«Նախնական մենք պլանավորում ենք Россграм–ը գործարկել մարտի վերջին գործընկերների և թոփ բլոգերների համար։ Ապրիլին` մյուս բոլոր օգտատերերի համար», – նշել է Զոբովը։

Ռուսական որոշ ԶԼՄ–ների հաղորդմամբ, Զոբովը Telegram–ի և ВКонтакте–ի ստեղծող Պավել Դուրովի համակուրսեցին է։–0–