ՌԴ–ում ՀՀ դեսպանատունը կոշտ արձագանք է տվել Փաշինյանի մասին ռուս հաղորդավարի սկանդալային հայտարարությանը (ՎԻԴԵՈ)
12:22
22 Նոյեմբերի 2018
ԵՐԵՎԱՆ, 22 նոյեմբերի. /Նովոստի–Արմենիա/. ՌԴ –ում ՀՀ դեսպանատունը կոշտ արձագանք է տվել ռուս ռադիոհաղորդավար, լրագրող Սերգեյ Դորենկոյի հայտարարություններին, ով «Խոսում է Մոսկվան» ռադիոկայանի եթերում սկանդալային հայտարարություն է արել Երևանում համասեռամոլների ֆորումի անցկացման հարցում ՀՀ վարչապետի պաշտոնակատար Նիկոլ Փաշինյանի դիրքորոշման մասին։
«Ռուսական մեդիադաշտում վերջին շրջանում բախվում ենք Հայաստանում տեղի ունեցող իրադարձությունների շուրջ տարբեր ոչ ադեկվատ, տրամաբանությունից զուրկ, պրովոկացիոն արտահայտությունների հետ։ Մեզ հիմնականում հասկանալի է, թե ինչու ռուսաստանցի այս կամ այն մեդիա ներկայացուցիչներ այդքան «մտահոգ են» հարցերով, որոնցում նրանք, մեղմ ասած, իրավասու չեն», – նշվում է դեսպանատան հայտարարության մեջ։
Նշվում է նաև, որ դիվանագիտական ներկայացուցչությանն, իհարկե, վայել չէ հանրային տարածքում մեկնաբանել անհեթեթություն և ցնդաբանություն (որքան էլ որ դա ոչ դիվանագիտական է հնչում) հիշեցնող արտահայտություններ։ Միաժամանակ, դժվար է չարձագանքել, մասնավորապես, այսպես կոչված «փորձագետների և լրագրողների կարծիքներին», ովքեր դուրս են գալիս քաղաքավարության սահմաններից և պարունակում են վիրավորանք։
«Որպես օրինակ ծառայում են լրագրող, «Խոսում է Մոսկվան» ռադիոկայանի հաղորդավար Սերգեյ Դորենկոյի` օրերս արված հայտարարությունները, ով իր հեղինակային հաղորդման ուղիղ եթերում քննարկել է համասեռամոլների թեման Հայաստանում։ Պարոն Դորենկոն մոռացել է եթերի էթիկայի բոլոր նորմերի մասին, և ամենայն հավանականությամբ առանձին դեմքերի մատուցմամբ իրեն թույլ է տվել մի շարք վիրավորական արտահայտություններ` մեր երկրի և մեր ղեկավարության հասցեին», – նշվում է դեսպանատան հայտարարության մեջ։
Նշվում է, որ լավ կլիներ, եթե Դորենկոն և նրա գործընկերները հրաժարվեին ապատեղեկատվություն տարածելու խղճուկ քաղաքականությունից։
«Մի′ խեղաթյուրեք իրականությունը, մանիպուլյացիայի մի′ ենթարկեք փաստերը։ Դուք պատասխանատու եք յուրաքանչյուր բառի համար։ Այդ պատասխանատվությունը Դուք առաջին հերթին կրում եք սեփական հեղինակության գնով», – նշվում է դեսպանատան հայտարարության մեջ։–0–
Շատերը լսել են, որ երջանիկ լինելու համար անհրաժեշտ է երջանկության հորմոն սերոտոնինը: Բայց հաճախ չգիտենք էլ, թե որքան սերոտոնին կարող է արտադրել մեր օրգանիզմը
