Ալբերտը երբեք ագրեսիվ չի եղել. «Շերեմետևոյում» մահացած երիտասարդի բարեկամուհին խոսել է նրա մասին

ԵՐԵՎԱՆ, 22 նոյեմբերի. /Նովոստի–Արմենիա/. Մոսկվայի «Շերեմետևո» օդանավակայանում ինքնաթիռի կողմից վրաերթի ենթարկված Ալբերտ Եփրեմյանի բարեկամուհին նշել է, որ Ալբերտը շատ հանգիստ մարդ էր, իրեն հատուկ չէր ագրեսիվ պահվածքը, հաղորդում է 360tv.ru–ն։

Հիշեցնենք, որ նոյեմբերի 20–ին Մոսկվայի «Շերեմետևո» օդանավակայանի թռիչքուղում հայտնաբերվել է ՀՀ քաղաքացի Ալբերտ Եփրեմյանի դին, ով արտաքսվել էր Իսպանիայից և Մադրիդից Մոսկվայով վերադառնում էր Հայաստան։ Ըստ նախնական տեղեկությունների, նա փախել է դեպի Երևան չվերթն իրականացնող օդանավին մոտեցող ավտոբուսից։ Մոսկվա–Աթենք չվերթի անձնակազմն օդ բարձրանալուց հետո դիսպետչերներին հայտնել է, որ օդ բարձրանալիս թռիչքուղու վրա ինչ–որ բանի հետ է բախվել, հնարավոր է` կենդանու։ Որոշում է կայացվել չվերադարձնել օդանավը, քանի որ, ըստ օդանավի համակարգերի, վնասվածքներ չեն հայտնաբերվել։

«Ես պատահական եմ իմացել, բացել եմ Facebook–ն ու տեսել։ Զանգահարեցի քրոջս` Հայաստան, նա ուժեղ լացում էր, սակայն նշեց, որ դա մեր Ալբերտն է։ Չեմ կարողանում ուժերս հավաքել և զանգել եղբորս, շոկի մեջ եմ», – նշել է Ալբերտի բարեկամուհին` Գրետան։

Նա ավելացրել է, որ Ալբերտը երբեք ագրեսիվ չի եղել։

«Նա շատ հանգիստ մարդ է, շատ», – ասել է Գրետան։–0–