ԵՐԵՎԱՆ, 11 հունվարի./Նովոստի-Արմենիա/. Իրանի իշխանությունները հայտարարել են, որ «Ուկրաինայի միջազգային ավիաուղիների» օդանավին Թեհրանում հարված է հասցվել «չկանխամտածված կերպով», հաղորդում է ՏԱՍՍ-ը՝ հղում անելով Associated Press-ի կողմից հրապարակված իրանական իշխանությունների պաշտոնական հայտարարությանը:
Նշվում է, որ ողբերգության պատճառ է դարձել «մարդկային գործոնը»:
Ուկրաինական օդանավի կործանման պատճառը «մարդկային սխալն» է, որը կատարվել է ԱՄՆ-ի «արկածախնդրության» հարուցած ճգնաժամի շրջանում, հայտնել է Իրանի արտգործնախարարը:
Իրանի նախագահ Հասան Ռոուհանին իր Twitter-յան էջում հայտնել է, որ Իրանը խորապես զղջում է թույլ տված աղետալի սխալի համար: Նա խոստացել է պատասխանատվության ենթարկել ուկրաինական օդանավի կործանման մեջ մեղավորներին:
Ավելի վաղ, Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը հայտարարել էր, որ Կիևը դիտարկում է Իրանում օդանավի կործանման չորս հիմնական վարկած, որոնց թվում են օդանավի հարվածումը զենիթային հրթիռի կողմից, օդանավի ներսում պայթյունը՝ ահաբեկչության հետևանքով:
Նախօրեին Newsweek ամսագիրը՝ հղում անելով երեք աղբյուրի, հայտնել էր, որ օդանավը կարող էին սխալմամբ հարվածել իրանական զենիթահրթիռային համակարգերը:
Հիշեցնենք, որ «Ուկրաինայի միջազգային ավիաուղիների» Boeing-737 օդանավը, որում եղել է 168 ուղևոր և անձնակազմի 9 անդամ, կործանվել է հունվարի 8–ին Թեհրանի օդանավակայանից օդ բարձրանալուց հետո։ Օդանավը Թեհրանից ուղևորվում էր Կիև։ Օդանավում գտնվող բոլոր մարդիկ մահացել են: Ուղևորների թվում են եղել Աֆղանստանի, Մեծ Բրիտանիայի, Իրանի, Կանադային, Ուկրաինայի, ԳԴՀ-ի և Շվեդիայի քաղաքացիներ: -0-