ԵՐԵՎԱՆ, 13 մայիսի. /Նովոստի-Արմենիա/. ՀՀ Օմբուդսմեն Արման Թաթոյանը մայիսի 12-ին Ստրասբուրգում հանդիպել է ԵԽ-ի գլխավոր քարտուղար Թուրբյորն Յագլանդի հետ, հաղորդում է Մարդու իրավունքների պաշտպանի գրասենյակի մամուլի ծառայությունը:
Թաթոյանը ԵԽ-ի գլխավոր քարտուղարին ներկայացրել է մարդու իրավունքների հիմնական խախտումները, որոնք իրականացվել են Լեռնային Ղարաբաղի Հանրապետության քաղաքացիական բնակչության նկատմամբ ապրիլի սկզբին Ադրբեջանի կողմից սանձազերծված մարտական ագրեսիայի ժամանակ:
Օմբուդսմենը ներկայացրել է նաև ադրբեջանական ԶՈՒ-ի վայրագությունների կոնկրետ օրինակներ և փոխանցել է Յագլանդին ԼՂՀ Մարդու իրավունքների պաշտպանի զեկույցը, որում ներկայացվում է այդ միջադեպերի վերլուծությունը:
Թաթոյանը հատկապես ընդգծել է Ադրբեջանի ագրեսիվ քաղաքականության կործանարար հետևանքները: Այդ քաղաքականությունը սերմանում է ատելություն և բռնություն հայերի նկատմամբ, ինչը հակասում է ԵԽ-ի ողջ իրավապաշտպան համակարգին: Ընդ որում, այդ քաղաքականությունը խրախուսվում է պետական մակարդակով և բացարձակ անհանդուժողական բնույթ է կրում:
Հանդիպման ժամանակ նշվել է, որ մարդու իրավունքների խախտումները ցանկացած պարագայում անթույլատրելի են, քանի որ մարդու իրավունքների պաշտպանությունը կապված չէ քաղաքականության հետ և սահման չի ճանաչում:
Կողմերը կարևորել են Մարդու իրավունքների պաշտպանի դերը երկրում եվրոպական չափանիշների ներդրման հարցում: Մասնավորապես, հանդիպման ժամանակ ընդգծվել է Օմբուդսմենի ինստիտուտի կարևորությունը Մարդու իրավունքների եվրոպական դատարանի որոշումները իրականացնելու գործում:
Քննարկվել են նաև ընտանիքում բռնությունների կանխարգելման և հաշմանդամների իրավունքների պաշտպանության հարցեր:
Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտայի նմիջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում