Թուրքիան Սիրիայի հետ սահմանը կմաքրի հակահրետանային ականներից

ԵՐԵՎԱՆ, 4 հունիսի. /Նովոստի-Արմենիա/. Թուրքիայի խորհրդարանը Սիրիայի հետ սահմանը շուրջ 500 հազար հակահրետանային ականներից մաքրելու մասին օրինագիծ կընդունի, ինչը թույլ կտա արտասահմանյան ընկերություններին ականազերծել 500 կմ երկարությամբ սահմանամերձ գոտին ու փոխարենը 49 տարով այն վարձակալելու իրավունք ստանալ, հաղորդում է «ՌԻԱ Նովոստին»։

Ընդդիմությունը հանդես էր գալիս օրինագիծն ընդունելու դեմ՝ հայտարարելով, որ այն հակասում է Թուրքիայի ազգային շահերին, սակայն երկրի վարչապետ Թայիպ Էրդողանը հերքել է արտասահմանյան, մասնավորապես, իսրայելական ընկերություններին ականազերծման պայմանագրերը փոխանցելու մտադրության մասին կառավարության հասցեին հնչող բոլոր մեղադրանքները։ Նա հայտարարել է նաև, որ ականազերծված հողը կօգտագործվի գյուղատնտեսական կարիքները հոգալու համար և թույլ կտա բարձրացնել հետամնաց թուրքական հարավ-արևելքի կենսամակարդակը։

Չորեքշաբթի լույս հինգշաբթի գիշերը օրինագիծն ընդունվել է, դրան կողմ է քվեարկել 225 պատգամավոր, 91՝ դեմ։ Թուրքական մեջլիսում 550 պատգամավոր կա։

Թուրքական ԶԼՄ-ների հաղորդագրությունների համաձայն՝ տարածքի մաքրումը մեկ ականից կարժենա 300-1000 դոլար։ Ընդ որում, ինչպես նշվում է թուրքական խորհրդարանի փորձագետների հետազոտության մեջ, վիճակագրությունը վկայում է այն մասին, որ 5000 ական ականազերծելիս միջին հաշվով զոհվում է մեկ մարդ և նվազագույնը երկուսը՝ վիրավորվում։ -0-