Հայաստանի զինված ուժերը գերազանցում են հակառակորդին և կարող են չեզոքացնել նրա ներուժը. Օհանյան
ԵՐԵՎԱՆ, 9 նոյեմբերի. /Նովոստի-Արմենիա/. Հայաստանի Զինված ուժերը գերազանցում են հակառակորդին և ընդունակ են չեզոքացնել նրա ներուժը, Հայաստանի Հանրային հեռուստաընկերությանը տված հարցազրույցում հայտարարել է Հայաստանի պաշտպանության նախարար Սեյրան Օհանյանը։
«Ադրբեջանի ղեկավարությունն այսօր սպառազինությունների ավելացմամբ փորձում է մեր Զինված ուժերի նկատմամբ որևէ առավելության հասնել, բայդ դրանք այն կարևոր ցուցանիշները չեն, որոնք հանգեցնում են ԶՈՒ մարտունակության բարձրացմանը»,- ասաց Օհանյանը։
Ըստ նրա, կան արձագանքման բազմաթիվ մեթոդներ՝ ինչպես դասական, այնպես էլ անհամաչափ, «որոնք կհանգեցնեն նրան, որ մենք կչեզոքացնենք նրանց հնարավորությունները»։
«Մարտունակության տարրերում, նախևառաջ, մենք պետք է որակային բնութագրեր փնտրենք։ Մեր զինված ուժերի մարտական պատրաստվածությունն ու մարտունակությունը, ընդհանուր առմամբ, պաշտպանական բարեփոխումների ողջ ընթացքը, բարոյահոգեբանական մթնոլորտը, ինչպես նաև մեր պատասխանատու մոտեցումները միջազգային խնդիրների կատարման վերաբերյալ խոսում են այն մասին, որ մենք առավելություն ունենք հակառակորդի զինված ուժերի նկատմամբ»,- ասաց Օհանյանը։
Ըստ նրա, դրան նպաստում է հայ զինծառայողների մարտական բարձր ոգին։
«Հատկապես առաջնային գծում, քանի որ մենք պաշտպանում ենք մեր երկիրը, մեր հայրենի հողը, և մենք կանենք ամեն ինչ, որպեսզի մեր ժողովրդի անվտանգությունը պատշաճ մակարդակով ապահովվի, և այն խաղաղությամբ կարողանա արարել»,- ասաց պաշտպանության նախարարը։
Օհանյանն ընդգծեց նաև, որ հայկական կողմը վերահսկում է ուժերի հավասարակշռությունը։ Մասնավորապես, նրա խոսքերով, այսօր առանց որևէ երրորդ կողմի, շնորհիվ ոչ թե քանակական, այլ որակական ցուցանիշների և զինծառայողների մարտական ոգու, հաջողվում է պահպանել հրադադարի ռեժիմը «ոչ պատերազմ, ոչ խաղաղություն» պայմաններում և արժանի պատասխան տալ սադրանքներին։ -0-
