Իրանի նախագահի Հայաստան այցի ժամկետները կհստակեցվեն դիվանագիտական խողովակներով
Իրանի նախագահ Մահմուդ Ահմադինեժադի Հայաստան կայանալիք այցի ժամկետները կհստակեցվեն դիվանագիտական խողովակներով, Թեհրանում ՀՀ վարչապետ Տիգրան Սարգսյանի և Իրանի նախագահ Մահմուդ Ահմադինեժադի հանդիպումից հաղորդում է հայկական կառավարության մամուլի ծառայությունը։
Հանդիպման ժամանակ ՀՀ վարչապետը վերահաստատել է Հայաստանի նախագահ Սերժ Սարգսյանի հրավերը Իրանի ղեկավարին` Հայաստան այցելելու վերաբերյալ։
ՀՀ կառավարության ղեկավարը վստահություն է հայտնել, որ Իրան կատարած պաշտոնական այցը նոր լիցք կհաղորդի հայ-իրանական տնտեսական կապերի աշխուժացմանը, որոնք դեռևս զիջում են բարձր մակարդակով քաղաքական հարաբերություններին։ Նա նաև շնորհակալություն է հայտնել Իրանի ղեկավարությանը հայ համայնքի նկատմամբ բարեհաճ վերաբերմունքի համար։
Իրանի նախագահն իր հերթին ցանկացած նախաձեռնությանն աջակցելու պատրաստակամություն է հայտնել՝ նշելով, որ տնտեսական կապերի որակը քաղաքական հարաբերություններին հասցնելու համար որևէ սահմանափակում չկա:
Նա երկու երկրների կառավարությունների միջև կապերի ամրապնդման գոհունակություն է հայտնել, ինչը կնպաստի հայ-իրանական համագործակցության ու բարեկամության զարգացմանը։
Զրուցակիցները կարևորել են համատեղ ձեռնարկությունների ստեղծումը, բանկային ոլորտում համագործակցությունն ու երկկողմ հետաքրքրություն ներկայացնող այլ հարցեր։
Վարչապետի գլխավորած հայկական պատվիրակությունը երկուշաբթի օրվանից երկօրյա աշխատանքային այցով Իրանում է գտնվում՝ ԻԻՀ առաջին փոխնախագահ Մոհամադռեզա Ռահիմի հրավերով։ -0-
