Հայաստանի ապագան պայմանավորված է ուսուցչի աշխատանքով. վարչապետ

ԵՐԵՎԱՆ, 4 հոկտեմբերի. /Նովոստի-Արմենիա/. Հայաստանի վարչապետ Տիգրան Սարգսյանը կարծում է, որ երկրի ապագան պայմանավորված է ուսուցչի աշխատանքով:

«Մեր ապագան մեծապես պայմանավորված է ուսուցչի աշխատանքով, որովհետև, ինչպիսի արժեքներ սերմանենք մեր երիտասարդ, մատաղ սերնդի մեջ, այնպիսի արդյունք էլ կունենանք։ Այնպես որ, ապագան կերտվում է այսօր և դուք եք այդ ապագայի կերտողները», - դիմելով ուսուցիչներին` նշել է կառավարության ղեկավարը Հայաստանի Հանրապետական կուսակցության կողմից ուսուցչի մասնագիտական տոնի առթիվ կազմակերպած ՀՀԿ անդամ ուսուցիչների պարգևատրման արարողության ժամանակ։

Կառավարության ղեկավարը նաև նշել է, որ մանկավարժների խնդիրները շարունակելու են մնալ գործադիրի ուշադրության կենտրոնում։

Տիգրան Սարգսյանը մատաղ սերնդի հայեցի դաստիարակության գործում և կրթության ու մանկավարժության բնագավառում ունեցած վաստակի համար վարչապետի հուշամեդալով պարգևատրել է հանրապետության տարբեր դպրոցներ ներկայացնող 10 ուսուցիչների։--0--