Խաչքարերի թանգարան՝ բաց երկնքի տակ
![Խաչքարերի թանգարան՝ բաց երկնքի տակ Խաչքարերի թանգարան՝ բաց երկնքի տակ](/upload/iblock/9f8/v3jame821yoimcreydkt0bmxugifim12.jpg)
ԵՐԵՎԱՆ, 29 սեպտեմբերի. /Նովոստի-Արմենիա/. Հայաստանում 2015 թվականին ծրագրվում է Խաչքարերի թանգարան ստեղծել բաց երկնքի տակ, ասաց Հայաստանի սփյուռքի նախարար Հրանուշ Հակոբյանը։
Խաչքարերն արվեստի հատուկ տեսակ են ներկայացնում, դրանք ազգային հնագույն ավանդույթների վրա հիմնված և ձևերի բազմազանությամբ ու հարստությամբ առանձնացող դեկորատիվ-ճարտարապետական քանդակներ են։ Խաչքարեր սկսեցին փորագրել IV դարի սկզբում՝ Հայաստանում քրիստոնեության ընդունումից անմիջապես հետո։
«Մենք ցանկանում ենք ստեղծել Հայոց ցեղասպանությանը նվիրված ողջ աշխարհում գոյություն ունեցող խաչքարերի փոքրացված կրկնօրինակները և տեղադրել դրանք Հայոց ցեղասպանության զոհերի հիշատակի հուշահամալիրի տարածքում»,- չորեքշաբթի ասաց նա գերատեսչության երկամյա գործունեությանը նվիրված մամուլի ասուլիսում։
Բացի այդ, Հակոբյանի խոսքերով, ծրագրվում է նաև Երևանում ամերիկահայ հայտնի նկարիչ Արշիլ Գորկու Տուն-թանգարանի ստեղծումը։
«Արշիլ Գորկին հինգ-վեց տարի Կոնդում է ապրել, և ես կարծում եմ, որ նրա տունը պետք է թանգարանի վերածել՝ ի նշան մեր ժողովրդի մեծ ներկայացուցիչներից մեկի նկատմամբ երախտագիտության»,- ասաց նա, հավելելով, որ արդեն համապատասխան խնդրանքով դիմել է Երևանի քաղաքապետ Գագիկ Բեգլարյանին։
Նախարարը նշեց նաև Հայկական տների ստեղծման անհրաժեշտությունը, որտեղ կգործեն դպրոցներ, մշակութային կենտրոններ, ցուցահանդեսների և բանակցությունների դահլիճներ, հայկական ապրանքների վաճառքի կետեր։
Այս կապակցությամբ նա դրական գնահատեց Ռուսաստանում Հայկական տների ստեղծման ձևավորված ավանդույթը։ -0-