Հայաստանում տղամարդկանց շուրջ 6%-ը և կանանց 4%-ը ոչ ավանդական կողմնորոշում ունեն. սեքսոպաթոլոգ
Հայաստանում տղամարդկանց շուրջ 5-6 տոկոսը համասեռամոլներ են, իսկ կանանց 3-4 տոկոսը՝ լեսբուհիներ, ուրբաթ լրագրողներին ասաց սեքսոպաթոլոգ Վրեժ Շահրամանյանը։
«Ներկայացված ցուցանիշները բավականին հարաբերական են, սակայն վիճակագրության համաձայն, տղամարդիկ կանանցից ավելի շատ են հակված սեքսուալ շեղումների, քանի որ այդ առումով ավելի խոցելի են»,- ասաց Շահրամանյանը։
Նա նշեց, որ դեռ հինգ տարի առաջ թվերը զգալիորեն քիչ էին, սակայն ազատ շփման ավելացումը, տեղեկատվության հասանելիությունը, ինչպես նաև համասեռամոլների համար հատուկ ակումբների ստեղծումը իրավիճակը դեպի վատն է փոխել։
Ըստ սեքսապոթոլոգի, նման ազատությունը բերել է նրան, որ ոչ ավանդական կողմնորոշում ունեցող մարդիկ դադարել են թաքնվել և սկսել են հասարակական վայրերում հայտնվել՝ համապատասխան տեսքով։ Չնայած, ինչպես նշեց փորձագետը, ոչ միշտ կարելի է արտաքին տեսքից և պահելաձևից բացահայտել նման մարդուն։
Շահրամանյանը նշեց, որ համասեռամոլության զարգացման պատճառներից մեկը տղաների սխալ սեքսուալ դաստիարակությունն է, չնայած կան բնածին համասեռամոլության դեպքեր։
«Համասեռամոլության զարգացման հիմնական պատճառները սկզբնավորվում են մանկական հասակում, երբ շատ ծնողներ, ովքեր ցանկացել են աղջիկ ունենալ, հաճախ տղային աղջկա զգեստ են հագցնում կամ այլ պարագաներ են օգտագործում, որոնք առավել հատուկ են աղջիկներին»,- ասաց Շահրամանյանը։
Ըստ նրա, համասեռամոլությունը չնայած որ չի դասվում հիվանդությունների շարքը (1973թ.-ին համասեռամոլությունը բացառվել է հոգեբանական առողջության խախտման շարքից), ամեն դեպքում այն միայն բժշկական ճանապարհով է հայտնաբերվում՝ մանկական հասակում հոգեբանական շեղումների, սեքսուալ երևակայության և նախասիրությունների ուսումնասիրման միջոցով։ -0-
