Հայաստանը դեռ ղարաբաղյան հակամարտության խաղաղ կարգավորման հույս ունի և չի մտածում այլ քայլերի մասին. ԱԳՆ
ԵՐԵՎԱՆ, 17 սեպտեմբերի. /Նովոստի-Արմենիա/. Հայաստանը դեռ ղարաբաղյան հակամարտության խաղաղ կարգավորման հույս ունի և չի մտածում այլ քայլերի մասին, ասել է Հայաստանի արտաքին գործերի նախարար Էդվարդ Նալբանդյանը Segodnya.ua պորտալին տված հարցազրույցում:
«Քանի դեռ բանակցային գործընթացը շարունակվում է և քանի դեռ հույս կա, որ խաղաղ ճանապարհով հնարավոր է կարգավորել ղարաբաղյան հակամարտությունը, մենք կարծում ենք, որ այլ քայլերի անցնելու անհրաժեշտություն չկա»,- ասել նա:
Նալբանդյանը նշել է, որ Հայաստանը մինչ օրս չի ճանաչել Լեռնային Ղարաբաղը, իսկ «չճանաչելով Լեռնային Ղարաբաղը՝ չի կարող ճանաչել, օրինակ, Կոսովոն, որն անկախ լինելու իրավունք ունի, բայց ոչ ավելի, քան Ղարաբաղը կամ բոլոր այն կազմավորումները, որոնք ճանաչվել են ավելի փոքր կամ մեծ թվով երկրների կողմից, բայց ճանաչված չեն ողջ միջազգային հանրության կողմից»:
«Եթե բանակցային գործընթացն արդյունք չտա և եթե Ադրբեջանի ամենօրյա սպառնալիքները որևէ ձախողման հանգեցնեն, ապա, անշուշտ, հարկ կլինի այլ քայլեր ձեռնարկել»,- ասաց նախարարը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
