Երևանի ReAnimania միջազգային անիմացիոն երկրորդ կինոփառատոնի «Լավագույն լիամետրաժ ֆիլմ» անվանակարգի հաղթող է ճանաչվել չինացի ռեժիսոր Լիու Ջիանի «Փիրսինգ 1» ֆիլմը, «Նովոստի-Արմենիա» գործակալությանը հաղորդեցին փառատոնի մամուլի ծառայությունից։
«Լավագույն հեռուստատեսային/կրթական ֆիլմ» անվանակարգում հաղթել է բրիտանացի ռեժիսոր Փիթ Բիշոպի «Նավթի պատմությունը» տեսաժապավենը, «Լավագույն կարճամետրաժ ֆիլմ» անվանակարգում լավագույնն է դարձել «Մեծ աղմուկ» իտալական ֆիլմը։
«Դեբյուտ» մրցանակի արժանացել է Մերի Կյուրեղյանը «Արևը և խավարասերը» ֆիլմի համար, իսկ «Ռոբ Սահակյանց» մրցանակի՝ Մաքս Հաուարդը, Կարինե Արոյանը և Լուսինե Քասարջյանը։
Մանկական ժյուրին մրցանակը տվել է գերմանացի ռեժիսորներ Յակոբ Ֆրեյնի և Հարրի Ֆաշթի «Բոբ» կինոնկարին։
ReAnimania միջազգային անիմացիոն երկրորդ փառատոնը Երևանում մեկնարկել է անցած հինգշաբթի և տևել է մինչև սեպտեմբերի 13-ը։
ReAnimania նախագծի նպատակն է հայկական անիմացիոն արվեստի զարգացմանն օգնելը, համաշխարհային կարգի անիմատոր նկարիչների նոր սերնդի դաստիարակումը և համաշխարհային ասպարեզում հայ անիմատորների աշխատանքների ցուցադրման համար քննարկումներ կազմակերպելը, ինչպես նաև հայ հանդիսատեսին ողջ աշխարհի լավագույն անիմացիոն ֆիլմերի օրինակները ներկայացնելը։
ReAnimania կինոփառատոնը Երևանում առաջին անգամ անցկացվել է 2009թ.-ի հոկտեմբերի 3-6-ը։ -0-
