Հազարամյակի զարգացման նպատակների մասին ազգային զեկույցի շնորհանդեսը տեղի է ունեցել Երևանում
«Հազարամյակի զարգացման նպատակները» ծրագրով Հայաստանի առաջընթացի մասին ազգային զեկույցի շնորհանդեսը տեղի է ունեցել ուրբաթ Երևանում:
«Ինչպես ցույց է տալիս այս հետազոտությունը, համաշխարհային հանրությունը կարող է փրկել միլիոնավոր կյանքեր՝ միջոցներ ներդնելով, առաջին հերթին, բնակչության առավել կարիքավոր շերտերի վիճակի բարելավման մեջ», - ուրբաթ շնորհանդեսի ժամանակ ասաց Հայաստանում ՄԱԿ-ի մշտական համակարգող Դաֆինա Գերչևան:
Նա ընդգծել է, որ Երևանում գործող ՄԱԿ-ի գործակալությունները մինչև 2015 թ.-ը կշարունակեն Հայաստանին անհրաժեշտ աջակցություն ցուցաբերել:
Նրա խոսքերով՝ զեկույցում արտացոլված հիմնական ասպեկտները վերաբերում են աղքատության և սովի մակարդակի կրճատմանը, որակյալ միջնակարգ կրթության ապահովմանը, գենդերային հավասարության աջակցմանն ու կանանց իրավունքների ընդլայնմանը:
«Այսօր կարևորագույն խնդիրների թվին են պատկանում նաև երեխաների մահացության թվի կրճատումը, նախածննդյան և հետծննդյան շրջանում մայրերի առողջական վիճակի բարելավումը, ՁԻԱՀ և ՄԻԱՎ վարակների դեմ պայքարը, ինչպես նաև շրջակա միջավայրի պահպանումը», - ասաց Գերչևան:
«Հազարամյակի զարգացման նպատակներ» ծրագրի շրջանակներում 2011-2015 թթ.-ին աշխարհում նախատեսվում է կանխել մինչև հինգ տարեկան 15 միլիոն երեխայի և 3 միլիոն նորածինների մահը, ինչպես նաև 33 միլիոն անցանկալի հղիություններ և փրկել հղիության ու ծննդաբերության ընթացքում բարդություններ ստացած 740 հազար կանանց կյանքը:
«Սրանք պարզապես թվեր չեն, այլ կոնկրետ անուններով մարդիկ, որոնց տառապանքներն անթույլատրելի են 21-րդ դարում», - նշել է Գերչևան:
Միջոցառման ընթացքում ներկայացվել է նաև «Արմենիա-ինֆո» տվյալների բազան, որը թույլ կտա զարգացման ոլորտի աշխատակիցներին, որոշումներ ընդունող անձանց, հետազոտողներին և հասարակությանը տեղեկատվություն ստանալ Հազարամյակի զարգացման նպատակների վերաբերյալ:
Հայաստանը 2000 թ.-ի սեպտեմբերին միացել է ՄԱԿ-ի Հազարամյակի հռչակագիրը ընդունած 189 երկրներին: Հետագայում Հազարամյակի զարգացման նպատակները ազգայնացվել են՝ երկրի առաջնահերթ խնդիրներին համապատասխանելու նպատակով և ստացել են իրենց արտացոլումը Հայաստանի զարգացման քաղաքականության ու ռազմավարության մեջ:-0
