Հայաստանի հանրակրթական դպրոցներում ներքին և արտաքին գնահատման մեխանիզմ կներդրվի
Հայաստանի հանրակրթական դպրոցներում կներդրվի ներքին և արտաքին գնահատման մեխանիզմ, երեքշաբթի հանրակրթության ոլորտի բարեփոխումներին նվիրված խորհրդակցության ժամանակ հայտնեց ՀՀ կրթության և գիտության նախարար Արմեն Աշոտյանը, հաղորդում է կառավարության մամուլի ծառայությունը։
Խորհրդակցությունն անցկացրել է ՀՀ վարչապետ Տիգրան Սարգսյանը։
Ըստ Աշոտյանի, բարեփոխումների շրջանակում, «Հանրակթության մասին» ՀՀ օրենքի պահանջից ելնելով, ՀՀ կառավարության որոշմամբ հանրապետության հանրակրթական դպրոցներում կներդրվի ներքին և արտաքին գնահատման մեխանիզմ, ինչը հնարավորություն կընձեռի մրցակցային սկզբունքով կազմելու դպրոցների վարկանիշերը։
Նախարարը տեղեկացրել է նաև, որ առաջիկայում կհաստատվի ուսուցիչների ատեստավորման կարգը, իսկ մինչև տարեվերջ կսկսվի դպրոցների տնօրենների հավաստագրման գործընթացը։
Քննարկմանը մասնակցել են ՀՀ նախարարներ, մարզպետներ ու շահագրգիռ գերատեսչությունների ներկայացուցիչներ։
Բացի դրանից, Աշոտյանը ներկայացրել է ոլորտի բարեփոխումների իրականացման ընթացքը, առկա խնդիրներն ու առաջնահերթ լուծում պահանջող անելիքները։
Խորհրդակցության մասնակիցները, ի թիվս այլ հարցերի, մասնավորապես քննարկվել են հանրակրթության բնագավառում պետական քաղաքականության միասնականության ապահովման, հանրակրթության որակի բարելավման և արդյունավետության բարձրացմանն առնչվող հարցեր։
«Ամփոփելով խորհրդակցությունը և վերահաստատելով տարածքային համաչափ զարգացման կարևորությունը, վարչապետ Տիգրան Սարգսյանը հանձնարարել է ուշադրութան կենտրոնում պահել հատկապես համայնքների դպրոցների խնդիրները»,- ասվում է հաղորդագրության մեջ։ -0-
