Հայաստանը միակ հնարավոր ռազմական դաշինքն է մտել, ասաց «Սահմանադրական իրավունք միություն» կուսակցության նախագահ Հայկ Բաբուխանյանը։
«Բնական է, որ մեկ այլ դաշինքի կազմ մտնելը, բացի Ռուսաստանի շուրջ ձևավորվածից, մենք չենք կարող պատկերացնել, քանի որ տարածաշրջանում ՆԱՏՕ-ն՝ ի դեմս Թուրքիայի, հակահայկական և ցեղասպանական տրամադրություններով օպերատոր ունի»,- երեքշաբթի «Նովոստի» միջազգային մամուլի կենտրոնում ասաց նա։
Նախորդ ուրբաթ Ռուսաստանն ու Հայաստանը արձանագրություն են ստորագրվել Գյումրիի ռուսական ռազմակայանի մասին 1995թ.-ին ստորագրված երկկողմ պայմանագրի մեջ փոփոխություններ կատարելու մասին, որոնք վերաբերում են փաստաթղթի գործողության ժամկետի երկարացմանը: 1995թ.-ին ստորագրված պայմանագրի գործողության ժամկետը 25 տարի էր, այժմ փաստաթուղթը գործելու է 49 տարի: Արձանագրությունների տակ ստորագրել են Հայաստանի և Ռուսաստանի պաշտպանության նախարարներ Սեյրան Օհանյանն ու Անատոլի Սերդյուկովը: Փաստաթուղթը ստորագրվել է երկու երկրների նախագահներ Սերժ Սարգսյանի և Դմիտրի Մեդվեդևի միջև տեղի ունեցած բանակցություններից հետո:
Ըստ Բաբուխանյանի, Հայաստանն այսօրվա դրությամբ ռազմական դաշինք մտնելուց բացի այլ տարբերակ չունի և չի կարող ունենալ։
«21-րդ դարի ընթացքում հայ ժողովուրդը եռակի անգամ ցեղասպանության է ենթարկվել, մեզ շրջապատում է թուրքական 100 միլիոնանոց բնակչությունը, որն ագրեսիվ է տրամադրված մեր հանդեպ, մեր կողքին ցեղասպանություն իրականացրած երկու պետություն է տեղակայված՝ Թուրքիան և Ադրբեջանը»,- պարզաբանեց նա։
Այդ համատեքստում Բաբուխանյանն ընդգծեց, որ Թուրքիան շարունակում է «ցեղասպանություն ծնող երկիր» մնալ, և նա ցանկացած պահի, ինչպես նաև՝ Ադրբեջանը, հնարավորության դեպքում կգնա դրա կրկնմանը։
Կուսակցության ղեկավարն այդ կապակցությամբ նշեց, որ Հայաստանը պետք է իր անվտանգությունն ապահովի կամ ռազմական դաշինք մտնելու միջոցով, կամ միջուկային զենքի առկայությամբ։ «Բնական է, որ երկրորդ տարբերակը՝ հնարավոր է ցանկալի, բայց հեռավոր ապագայի գործ է, այդ պատճառով այսօր իրական քաղաքականությունը ռազմական դաշինքի կազմ մտնելն է»,- ամփոփեց Բաբուխանյանը։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
