Ճգնաժամը հայկական շուկան մաքրել է անորակ կոնյակներից. Գինեգործների միություն

Գլոբալ համաշխարհային ճգնաժամը հայկական գինեգործության շուկային երկու դրական արդյունք է տվել՝ շուկան մաքրել է անորակ ու կեղծ կոնյակից և դիվերսիֆիկացրել է շուկան, ասաց ՀՀ գինեգործների միության նախագահ Ավագ Հարությունյանը։

«Նախկինում խաղողի 90 տոկոսը նախատեսվում էր կոնյակի արտադրության համար, և միայն մնացած հումքն էր ուղղվում գինու արտադրությանը։ Ճգնաժամը 70 տոկոսով կրճատել է կոնյակի արտադրության ծավալը, քանի որ երկրում դադարել են անորակ և կեղծ կոնյակ արտադրել։ Դա ճգնաժամի առաջին դրական արդյունքն է՝ շուկան մաքրվել է անորակ կոնյակից»,- երեքշաբթի մամուլի ասուլիսի ժամանակ հայտնեց Հարությունյանը։

Պաշտոնական վիճակագրական տվյալների համաձայն, 2009թ.-ի հունվար-դեկտեմբեր ամիսներին Հայաստանում ավելի քան 9,8 մլն լիտր կոնյակ է արտադրվել, ինչը 38,4 տոկոսով քիչ է 2008թ.-ի ցուցանիշից։ Միաժամանակ Հայաստանում 2010թ.-ի առաջին կիսամյակում կոնյակի արտադրությունը 38,2 տոկոսով ավելացել է և գերազանցել է 5 մլն լիտրը։

Ինչպես նշեց Գինեգործների միության ղեկավարը, ճգնաժամի երկրորդ դրական արդյունք է դարձել շուկայի դիվերսիֆիկացումը։ Ինչպես պարզաբանեց նա, եթե կոնյակի արտադրողները մինչև անցած տարի զբաղվում էին գինու արտադրությամբ՝ այն դիտարկելով միայն որպես իմիջային մթերք, ապա այժմ նրանք գիտակցել են գինու կարևորությունը որպես պահեստային մթերքի՝ ճգնաժամի ծանր հետևանքներից խուսափելու համար լրացուցիչ խթանի։

Հարությունյանն ավելացրեց, որ կոնյակի շատ արտադրողներ սկսել են գինու արտադրությանը մեծ ուշադրություն դարձնել և շուկայում նոր խաղացողներ են հայտնվել, ովքեր հիմնական շեշտը դրել են հենց այդ տեսակի ալկոհոլի վրա։

2010թ.-ի առաջին կիսամյակի ընթացքում Հայաստանում գինու արտադրության բարձրացում է գրանցվել 32,3 տոկոսով՝ մինչև 2005,6 հազար լիտր։ -0-