«Ժամադրություն Հայաստանի հետ» հայ-ռուսական ակցիան կանցկացվի Հայաստանում
Մեծ Հաղթանակի 65-ամյակին նվիրված «Ժամադրություն Հայաստանի հետ» հայ-ռուսական առաջին մշակութային ակցիան կանցկացվի Երևանում և Գյումրիում օգոստոսի 12-15-ը, տեղեկացրեց ՀՀ մշակույթի նախարարության հասարակայնության հետ կապերի բաժնի պետ Գայանե Դուրգարյանը:
«Ծրագրի շրջանակներում հետաքրքիր և բազմաբնույթ միջոցառումներ են նախատեսված, այդ թվում նաև՝ մշակույթի ոլորտում առկա հրատապ խնդիրներին նվիրված «կլոր սեղան»», - չորեքշաբթի Երևանում լրագրողներին ասաց Դուրգարյանը:
Մամուլի ասուլիսին ներկա Ռուսաստանի կինեմատոգրաֆիստների միության քարտուղար Սերգեյ Նովոժիլովն իր հերթին նշեց, որ ռուսական պատվիրակության կազմում ներառված են խորհրդային ռուսական կինեմատոգրաֆի վառ ներկայացուցիչները, ովքեր ժամանակին նկարահանվել են հայ-ռուսական համատեղ ֆիլմերում:
Նրանց թվում նա նշեց ԽՍՀՄ ժողովրդական արիստ Իննա Մակարովային, ԽՍՀՄ ժողովրդական արտիստ Եվգենի Դոգուին, Ռուսաստանի ժողովրդական արտիստ Նատալյա Ֆատեևային, Ռուսաստանի վաստակավոր արտիստներ Նատալյա Վառլյեին և Սվետլանա Սվետլիչնայային, Սվետլանա Տոմային (Ֆոմիչևա), Տիմոֆեյ Ֆեդորովին, Անդրեյ Մեժուլիսին:
Ակցիայի շրջանակներում կցուցադրվեն 2009 և 2010 թթ.-ին նկարահանված երեք ռուսական ֆիլմեր, որոնք արժանացել են մի շարք միջազգային կինոմրցանակների՝ Ալյոնա Սեմյոնովայի և Ալեքսանդր Սմիրնովի «Արոսենու վալսը», Վերա Գլագոլևայի «Մեկ պատերազմ» և Ալեքսանդր Սամոխվալովի «Մենք ապագայից ենք-2» ֆիլմերը:
Բացի այդ, Նովոժիլովի խոսքերով, ակցիայի շրջանակներում Երևանի Մոսկվայի տանը տեղի կունենա լուսանկարների ցուցահանդես՝ նվիրված է Մեծ Հաղթանակի 65-ամյակին, նախատեսվում է նաև կազմակերպել համերգ և հանդիպել Գյումրի քաղաքում գտնվող ռուսական ռազմական կայազորի զինծառայողների հետ:
Հայաստանի կինեմատոգրաֆիստների միության քարտուղար Ռուդոլֆ Վաթինյանն իր հերթին նշեց, որ այս ակցիան շատ արժեքավոր է Հայաստանի համար և հաստատում է երկու երկրների միջև գոյություն ունեցող բազմադարյա բարեկամությունը:
Ակցիան անցկացվում է Հայաստանի և Ռուսաստանի մշակույթի նախարարությունների, Մոսկվայի կառավարության, Հայաստանի և Ռուսաստանի կինեմատոգրաֆիստների միությունների, Հայաստանի թատերական գործիչների միության և «Կինոֆորում» ռուսական ինքնավար ոչ առևտրային կազմակերպության աջակցությամբ:-0-
