Հայաստանն ու Եվրոպական ներդրումային բանկը վարկային համաձայնագիր են ստորագրել Երևանի մետրոպոլիտենը վերակառուցելու համար

Երևանի Մետրոպոլիտենի վերակառուցման ծրագրի իրականացման նպատակով երեքշաբթի  ՀՀ ֆինանսների նախարար Տիգրան Դավթյանը և Եվրոպական ներդրումային բանկի Եվրոպական  մոնետար համակարգի և Արևելյան Եվրոպայի, Ռուսաստանի, Կովկասի և Կենտրոնական Ասիայի շրջակա միջավայրի էներգետիկայի բաժնի Կոնստանտին Սինադինոն 5 մլն եվրո արժողությամբ վարկային համաձայնագիր են ստորագրել, հաղորդում է ՖՆ մամուլի ծառայությունը:

Վարկը տրամադրվում է 15 տարի մարման ժամկետով, որից 4 տարին` արտոնյալ,  6-ամսյա EURIBOR + 0.75 տոկոսադրույքով:

Միջոցներն ուղղվելու են Երևանի մետրոյի համակարգի վթարային վերականգնման ներդրումային ծրագրի իրականացմանը, որի շրջանակում այս փուլում կվերականգնվի մետրոյի շարժակազմը, կվերանորոգվեն մաշված երկաթուղագծի և էլեկտրամատակարարման համակարգի բաղադրամասերը, կփոխվեն տեխնիկական գնացքն ու պոմպակայանները` մետրոյի անվտանգ ու հարմարավետ  շահագործումն ապահովելու նպատակով:

Նշված գումարը հանդիսանում է ծրագրի առաջին փուլի համար նախատեսված 15 մլն եվրո ընդհանուր փաթեթի բաղկացուցիչ մասը:

Այդ գումարից ևս 5 մլն եվրո վարկ տրամադրվում է Վերակառուցման և զարգացման եվրոպական բանկի կողմից, որի վերաբերյալ համաձայնագիրը ստորագրվել է ս.թ. մարտի 10-ին, իսկ մյուս 5 մլն եվրոն` որպես դրամաշնորհ, կտրամադրի Եվրոպական Միության Հարևանության Ներդրումային ծրագիրը:

Ծրագրի առաջին փուլը նախատեսվում է ավարտել 2012 թվականի վերջին:-0-