Իրանի Մեջլիսի նախագահը կայցելի Հայաստան

Իրանի Մեջլիսի նախագահ Ալի Լարիջանին ՀՀ ԱԺ խոսնակ Հովիկ Աբրահամյանի հրավերով կայցելի Հայաստան՝ երկու բարեկամ երկրների միջև միջխորհրդարանական կապերը ավելի խորացնելու և զարգացնելու նպատակով, երեքշաբթի «Նովոստի-Արմենիա» գործակալությանը տեղեկացրեցին ՀՀ ԱԺ մամուլի ծառայությունից:

Նախօրեին Ժնևում կայացած  խորհրդարանների նախագահների համաշխարհային երրորդ համաժողովի շրջանակներում տեղի ունեցած հանդիպման ընթացքում Աբրահամյանը նշել է, որ հայ-իրանական հարաբերությունները գտնվում են բարձր մակարդակի վրա և շարունակում են զարգանալ փոխվստահության մթնոլորտում, ինչին նպաստում է նաև ՀՀ և ԻԻՀ օրենսդիր մարմինների համագործակցությունը:

Այս համատեքստում կողմերը կարևորել են 2009 թ.սեպտեմբերին Իրան կատարած ԱԺ նախագահի այցի ընթացքում ստորագրված Փոխըմբռնման հուշագիրը:

Հովիկ Աբրահամյանը բարձր է գնահատել երկու խորհրդարաններում բարեկամության պատգամավորական խմբերի գործունեությունը, որոնց փոխայցելություններն աշխուժություն և նոր լիցք են հաղորդում  միջխորհրդարանական կապերին:

Խոսնակի խոսքերով՝ երկու երկրների համագործակցությունը զգալի ներուժ ունի նաև տնտեսական բնագավառում:

Կողմերը կարևորել են նաև միջազգային կառույցներում համագործակցությունը և երկուստեք նշել, որ տարածաշրջանային հակամարտությունների և ճգնաժամերի ընթացքում Հայաստանի և Իրանի իշխանություններն աչքի են ընկել հավասարակշռված և շրջահայաց մոտեցումներով:

Հանդիպման ընթացքում անդրադարձ է կատարվել հայ-թուրքական հարաբերություններին և ԼՂ հիմնախնդրին:

Երկու խորհրդարանների նախագահները շեշտել են, որ տարածաշրջանային անվտանգության և կայունության համար հակամարտությունները պետք է լուծվեն խաղաղ, բանակցային ճանապարհով:-0-