ՀՀ Օմբուդսմենը ՀՀ Սահմանադրության և դրա դրույթների իրականացման միջև անդունդ է տեսնում
ՀՀ Սահմանադրության և դրա դրույթների իրականացման միջև անդունդ է գոյացել, կարծում է ՀՀ մարդու իրավունքների պաշտպան Արմեն Հարությունյանը:
«Հետխորհրդային տարածքի երկրներում, բացի մերձբալթյան երկրներից, Սահմանադրության հետ կապված երկու խնդիր կա` տեքստում տեղ գտած թերություններն ու Սահմանադրության դրույթների իրականացման խնդիրը: ՀՀ Սահմանադրության տեքստը, հատկապես բարեփոխումից հետո, գրեթե կատարյալ է: Ինչ վերաբերում է իրականացմանը, ապա իրական կյանքը շատ է տարբերվում Սահմանադրության մեջ ամրագրված դրույթներից», - ուրբաթ մամուլի ասուլիսի ժամանակ հայտարարեց Օմբուդսմենը:
Նրա խոսքերով` խոսքը հատկապես երկրի Մայր Օրենքում ամրագրված բազմակարծության, ազատ տնտեսական հարաբերությունների, ժողովրդավարության դրույթների մասին է:
«Հայաստանում գոյություն չունի ազատ շուկայական տնտեսություն: Մեր տնտեսական համակարգը օլիգարխիկ է: Քանի դեռ նման համակարգը գործում է, քաղաքական ազատությունների մասին խոսելն անիմաստ է», - ընդգծեց Հարությունյանը:
Նա ավելացրեց, որ Հայաստանում մարդու իրավունքների խախտման մոտավորապես 80 տոկոսը վերաբերում է մարդու սահմանադրական իրավունքներին:-0-