ԵՐԵՎԱՆ, 20 մայիսի. /Նովոստի-Արմենիա/. Հայաստանի և ՌԴ Օրենբուրգի մարզի միջև երկկողմ համագործակցության մասին համաձայնագիր կստորագրվի մայիսի 21-ին, hինգշաբթի Հայաստանի նախագահ Սերժ Սարգսյանի հետ հանդիպման ընթացքում հայտարարեց Օրենբուրգի մարզի ղեկավար Ալեքսեյ Չեռնիշևը, հաղորդում է Հայաստանի նախագահի մամուլի ծառայությունը։
Հաղորդագրության համաձայն` մայիսի 21-ին կստորագրվի երկկողմ համագործակցության մասին համաձայնագիր, որի նպատակն է հստակեցնել գործակցության ընդհանուր ուղղություններն ու փոխշահավետ կապեր հաստատել:
Նախագահ Սարգսյանի խոսքով` բարձր մակարդակի քաղաքական հարաբերությունները պետք է ամրապնդվեն փոխշահավետ տնտեսական կապերով ու ծրագրերով:
Նա ջերմությամբ հիշեց Օրենբուրգ կատարած իր այցը 2009 թվականի օգոստոսին։ Սերժ Սարգսյանը մեկ անգամ ևս երախտագիտություն է հայտնել Օրենբուրգում ապրող հայերի նկատմամբ դրսևորվող վերաբերմունքի համար։ Սարգսյանն ընդգծեց, որ Օրենբուրգի մարզում ազգամիջյան շփումների մշակույթը կարող է արժանի օրինակ ծառայել։
Իր հերթին Ալեքսեյ Չեռնիշևն իր գոհունակությունն է հայտնել Հայաստան այցելելու և ՀՀ Նախագահի հետ հանդիպելու հնարավորության համար: «Ձեր այցը Օրենբուրգ ոչ միայն տեղի հայ համայնքը, այլև բոլոր օրենբուրգցիները գնահատեցին որպես Ռուսաստանի և Հայաստանի ժողովուրդների միջև համագործակցությանն ուղղված մեծ քայլ»,- ընդգծել է մարզի ղեկավարը:
Նա ասել է, որ իր հետ Հայաստան է ժամանել բավականին ներկայացուցչական պատվիրակություն, որի կազմում են տարբեր ոլորտների ղեկավար-մասնագետներ:
Կողմերը նշել են, որ Հայաստանի և Ռուսաստանի միջև առկա ռազմավարական հարաբերությունների մակարդակը, ակտիվ երկխոսությունը բարձր մակարդակի վրա են։ Նշվել է, որ երկու ժողովուրդների դարավոր բարեկամությունն ու փոխադարձ համակրանքը լավ ազդակ են նաև միջմարզային բնագավառում փոխգործակցությունը խորացնելու ու նոր որակի հասցնելու համար:
2009 թվականին Հայաստանի և Ռուսաստանի միջև ապրանքաշրջանառությունը կազմել է մոտ 901,5 մլն դոլար, որից ներկրումը կազմել է 108 մլն դոլար, իսկ արտահանումը՝ 794 մլն դոլար։ Օրենբուրգի և Երևանի միջև ապրանքաշրջանառությունը 2009 թվականին կազմել է 103 մլն դոլար, որից ներկրումը կազմել է 57 հազար դոլար, իսկ արտահանումը՝ 45 մլն դոլար։ Օրենբուրգից հիմնականում ներկրվում է ասբեստ, մետաղներ, սարքավորումներ, իսկ Հայաստանի արտահանվում է քարեր, շինանյութ։ Ներկայումս Օրենբուրգում գործում է հայկական կապիտալով ութ ձեռնարկություն։ -0-
