Երևան-Շուշի ավտոարշավ կանցկացվի ՀՄՊ-ի 65-ամյակի և Շուշիի ազատագրման 18-ամյակի կապակցությամբ

ՀՄՊ-ի 65-ամյակին և Շուշիի ազատագրման 18-ամյակին նվիրված ակցիա-ավտոարշավը կմեկնարկի մայիսի 9-ին Երևանի Հաղթանակի զբոսայգուց, հայտնեց ակցիայի կազմակերպիչներից Լիլիթ Ադիբեկյանը։ 

«Ակցիան նվիրված է նրանց, ովքեր հայ ժողովրդին հաղթանակ բերեցին Հայրենական մեծ և Ղարաբաղի պատերազմներում։ Մենք դիտարկում ենք այս ակցիան որպես հաջորդ տարի նախատեսվող ակցիայի նախապատրաստական փուլ։ Դա կլինի Երևան-Մոսկվա ավտոարշավ», - հինգշաբթի մամուլի ասուլիսում ասաց Ադիբեկյանը։

Ըստ նրա՝ Երևան-Շուշի ավտոարշավի ֆինանսավորումն իրենց վրա են վերցրել հենց մասնակիցները։

Ադիբեկյանը նշեց, որ ակցիային կմասնակցի 20 մարդ, ովքեր Գեորգիևյան ժապավեններով զարդարված ավտոմեքենաներով կմեկնեն Շուշի, որտեղ ծաղիկներ կդնեն Անհայտ զինվոր հուշարձանին և ծիրանենիներ կտնկեն։

«Հույս ունենք, որ այդ ակցիան գեղեցիկ ավանդույթ կդառնա»,- ասաց նա։

Երկրորդ համաշխարհային պատերազմի տարիներին հայ ժողովուրդը ռազմաճակատ է ուղարկել 600 հազ. զինվոր, որոնցից 300 հազարը հենց Հայաստանից, իսկ 200 հազարը՝ խորհրդային այլ հանրապետություններից, ևս 100 հազար զինվոր՝ արտասահմանյան երկրներից։ Ռազմական գործողությունների ընթացքում զոհվել է շուրջ 175 հազար հայ։

Պատերազմի տարիներին հայ ժողովուրդը 106 հերոս է ունեցել։ Երկրորդ համաշխարհային պատերազմի խոշորագույն զինվորական հրամանատարներն են  Խորհրդային միության կրկնակի հերոս, մարշալ Իվան (Հովհաննես) Բաղրամյանը, զրահատանկային զորքի գլխավոր մարշալ Համազասպ Բաբաջանյանը, ավիացիայի մարշալ Սերգեյ Խուդյակովը (Արմենակ Խամփերյանց), ԽՍՀՄ նավատորմի ծովակալ Իվան Իսակովը։ Հայ ժողովուրդը պատրաստել և ռազմաճակատ է ուղարկել վեց մոտոհրաձգային դիվիզիա, իսկ Թամանյան 89-րդ դիվիզիան հասել է մինչև Բեռլին։