Աբու Դաբիի փառատոնի ժամանակ առաջին անգամ քանոն է հնչել
Աբու Դաբիում անցկացվող Միջազգային երաժշտական յոթերորդ փառատոնի ժամանակ Հայաստանի վաստակավոր արտիստ, Կոմիտասի անվան կոնսերվատորիայի պրոֆեսոր Հասմիկ Լեյլոյանի կատարմամբ առաջին անգամ հնչել է հայկական երաժշտական գործիքը՝ քանոնը:
«Քանոնը դուդուկի հետ միասին աշխարհում մեծ հանրաճանաչություն է վայելում՝ որպես հայկական երաժշտական գործիք, քանի որ քանոնի հայկական դպրոցը բացառիկ է և հայտնի տոների մաքրությամբ և կենտրոնացվածությամբ՝ առանց արևելյան ելևէջների», - երեքշաբթի «Նովոստի» միջազգային մամուլի կենտրոնում ասաց Լեյլոյանը:
Նա նշեց, որ խոշոր երաժշտական միջոցառմանը մասնակցելու հրավերն ինքը ստացել էր հայտնի արաբ օպերային երգիչ Վադի Էլ Սաֆիից:
Էլ Սաֆին ժամանակակից լիբանանյան երաժշտության հիմնադիրներից մեկն է:
Լեյլոյանը նշեց, որ առաջին անգամ չէ, որ ելույթ է ունենում արաբական երկրներում, սակայն Աբու Դաբիի փառատոնի հրավերը տարբերվում էր նրանով, որ այն արվել էր ոչ թե տեղի հայերի, այլ Լիբանանի և Եգիպտոսի ներկայացուցիչների կողմից:
«Քանոնը լայն տարածում ունի ոչ միայն Հայաստանում, այլև արաբական երկրներում», - ընդգծեց երաժիշտը:
Աբու Դաբիի միջազգային երաժշտական փառատոնի շրջանակներում (մարտի 20-ից ապրիլի 7-ը) Հասմիկ Լեյլոյանի ելույթը տեղի է ունեցել 2010 թ.-ի ապրիլի 3-ին «Կամերտոն» հայկական կամերային համույթի հետ միասին՝ Լիանա Խանդկարյանի ղեկավարությամբ:
Լեյլոյանի կատարմամբ հնչել են ինչպես Պագանինիի, Գունոյի, Սարասատեի, Շոպենի, Խաչատրյանի, Սպենդիարյանի դասական ստեղծագործությունները, այնպես էլ Կոմիտասի, Սայաթ-Նովայի ստեղծագործություններն ու հայկական ժողովրդական ստեղծագործություններ:
Փառատոնի մասնակիցների թվում են եղել Լեհաստանի ռադիո-սիմֆոնիկ նվագախումբը և Քշիշտով Պենդերենսկին, Նյու Յորքի «Մետրոպոլիտեն» օպերային թատրոնը, Լոնդոնի սիմֆոնիկ նվագախումբը, դաշնակահար Վեյնե Մարշալը, Ռուսաստանի Մեծ թատրոնի, Մարիինյան օպերայի և բալետի պետական թատրոնի մենակատարները, ԱՄՆ-ն ներկայացնող «Ալ Դիվո» քառյակը:
Աբու Դաբիի միջազգային երաժշտական փառատոնը հիմնադրվել է 2004 թ.-ի ապրիլին՝ ՄԱԷ-ի գերագույն շեյխ Բին Զայեդ Էլ Նախյանի հովանու ներքո՝ «Մուբադալա» զարգացման ընկերության ֆինանսական աջակցությամբ: Այսօրվա դրությամբ փառատոնը պետության խոշորագույն մշակութային իրադարձություններից մեկն է, որին մասնակցում են Անգլիան, Ֆրանսիան, Գերմանիան, Ռուսաստանը, ԱՄՆ-ն, Ուկրաինան, Լիբանանը, Եգիպտոսը ներկայացնող երաժիշտներ և նվագախմբեր:-0-
